باڵیۆزی تورکیا لەبارەی کوژرانی گەشتیارەکەی دهۆک سەرۆکوەزیران بارزانی دڵنیادەکاتەوە

ئاڤا نیوز

باڵیۆزی تورکیا لە عێراق ڕوونکردنەوەی پێویست لەبارەی کوژرانی گەشتیارەکەی دهۆک لە ئیستەنبووڵ بە سەرۆکوەزیران بارزانی دەدات، دڵنیای دەکاتەوە "هیچ بەربەست و ئاستەنگێک لەبەردەم گەشتیارانی هەرێمی کوردستان ناهێڵن".

 

وێنە گەورەکە: ئەمڕۆ چوارشەممە  ‌ئانل بۆرا ئينان، باڵيۆزى نوێى توركيا له‌ عێراق سەردانی سەرۆکوەزیران مەسرور بارزانی کرد و جەختیان لە بەهێزکردنی پەیوەندییەکانیان لە سەرجەم بوارەکان کردەوە بەتایبەتی لەڕووی بارزگانییەوە.

 

ڕاگەیێنراوی فەرمی: هەردوولا نیگەرانییان بەرامبەر تاوانی کوژرانی گەشتیارەکەی دهۆک لە ئیستەنبووڵ دەربڕیوە، باڵیۆزی تورکیا دووپاتی کردووەتەوە تاوانباران دەستگیرکراون و ڕێککاری یاساییان بەرامبەر دەگیرێتەبەر.

زانیاریی زیاتر: هەردوولا هاوڕا بوون لەسەر نەهێشتنی هەر کێشە و ئاستەنگێک کە بۆ گەشتیارانی هەرێمی کوردستان لەکاتی سەردانیان بۆ تورکیا دێتەئاراوە.

لە لایەکی دیکەوە: تەوەرێکی دیکەی کۆبوونەوەکە تایبەت بوو بە پرۆژەی ستراتیجيی ڕێگەی گەشەپێدان، کە وڵاتانی کەنداو لەڕێگەی عێراقەوە بە تورکیا و ئەوروپا دەبەستێتەوە، هەردوولا هاوڕا بوون لەسەر پێویستیی بەشداربوونی هەرێمی کوردستان و هەموو پێکهاتەکانی عێراق لەم پرۆژە گرنگەدا.

 

باکگراوند: ڕۆژی شەممە 31-08-2024، لە شاری ئیستەنبووڵی تورکیا بازرگانێکی کورد بە ناوی 'حەکیم لوقمان' لەلایەن ژمارەیەک هاووڵاتیی تورک کوژرا و برایەکیشی بریندار کرا، ڕووداوەکەش کاردانەوەی فراوانی لێکەوتەوە.