زانیاریی نوێ لەبارەی چارەسەربوونی پرسی مووچە

ئاڤا نیوز 

شاخەوان عەبدوڵڵا، جێگری سەرۆكی پەرلەمانی عێراق لەگەڵ تەیف سامی، وەزیری دارایی عێراق سەبارەت بە مووچەی فەرمانبەرانی هەرێمی كوردستان كۆدەبێتەوە و پەیامێکی تایبەتی پێدەگەیێنێت.

لێدوانی فەرمی: شاخەوان عەبدوڵڵا، لە كۆنفڕانسێكی ڕۆژنامەوانیدا ڕایگەیاند: مووچەی فەرمانبەرانی هەرێمی كوردستان بەمشێوەیەی كە ئێستا عێراق دوایدەخات بەردەوام نابێت، بەڵكو هەندێك ڕێككاری كارگێڕی هەیە دەكرێت، دوێنێ قسەم لەگەڵ وەزیری دارایی عێراق كرد و پێمگوت: "ئه‌گه‌ر تێبینی دیكه‌ت هه‌یه‌ ئێستا بیڵێ، چونكه‌ ناكرێت هه‌ر ڕۆژێك جۆره‌ بیانوویه‌ك بهێنیته‌وه‌ بۆ دواكه‌وتنی مووچه‌ی فه‌رمانبه‌ران".

زانياريي زياتر: جێگری سەرۆكی پەرلەمانی عێراق ئاماژەی بەوە دا فراكسیۆنە كوردستانییەكان ڕێككەوتوون دوای ئەوەی وەڵامی دوایین تێبینییەكان درایەوە، چیدیكە ڕێگە بە وەزارەتی دارایی عێراق نەدرێت هیچ جۆرە بیانوویەكی دیكە بدۆزێتەوە.

ئەوەش بزانە: سەبارەت بە گرفتی ناو لە لیستی مووچەی فەرمانبەران، بڕیاردرا كە ئەو ناوە سیانی و چوارییانەی كە دووبارەن وەزارەتی دارایی هەرێمی كوردستان وردەكاریی زیاتر بنێرێت بۆ ئەوەی وەزارەتی دارایی عێراق دڵنیابێتەوە كە كەسەكان جیاوازن.

ئەوەی پێویستە بیزانیت: ئەو مامۆستا و فەرمانبەرانەی هەرێمی كوردستان كە تەنیا دەوامیان لە ناوچە كوردستانییەكانە و بە میلاك لەسەر حكومەتی هەرێمی كوردستانن، هەوڵ دەدرێت میلاكەكانیان بگوازرێتەوە سەر عێراق.