ناتەنیاهۆ بۆ بلینكن: داننان بە دەوڵەتی فەڵەستین وەک خەڵاتکردنی هێرشکارانی 7ـی ئۆکتۆبەرە

ئاڤا نیوز

بنیامین ناتەنیاهۆ، سەرۆكوەزیرانی ئیسرائیل هەفتەی ڕابردوو بە ئەنتۆنی بلینكن، وەزیری دەرەوەی ئەمریكای ڕاگەیاندووە، دانپێدانانی ڕاستەوخۆ یان ناڕاستەوخۆی ئەمریكا بە فەڵەستین وەك خەڵاتێك وایە بۆ ئەو كەسانەی پلانیان بۆ "كۆمەڵكوژییەكەی" ئیسرائیل لە حەوتـی تشرینی یەكەمی ساڵی ڕابردوو داڕشتبوو.

بۆچی گرنگە: دانپێدانانی لەو شێوەیە لەلایەن ئەمریكاوە تادێت نیگەرانییەكانی حكومەتی ئیسرائیل زیاتر دەكات، لە ئەنجامدا فشارێكی زۆر دەخاتە سەر ئیسرائیل بۆ ئەوەی لە داهاتوودا دەوڵەتی فەڵەستین قبووڵ بكات.

ئەوەی پێویستە بیزانیت: ناتەنیاهۆ لە كۆبوونەوەیەکی لەگەڵ بلینكن لە قودس، ئەگەری دانپێدانانی ئەمریكای بە فەڵەستین  وروژاندووە و ناڕەزایی دەربڕیوە لەوەی ئەمریكا تەنانەت بیر لە بژاردەیەكی لەوشێوەیە دەكاتەوە، بێ گەڕانەوە بۆ ئیسرائیل و گوێگرتن لە بۆچوونەكان سەبارەت بەم پرسە.

لێدوانی فەرمی: بەرپرسێكی ئیسرائیل بە ئاژانسی ئاكسیۆسی گوتووە، "ناتەنیاهۆ بە ڕوونی بە بلینكنی گوت: هەنگاوێكی لەو شێوەیەی ئەمریكا ئەوە وایە گۆڵ لە خۆتان بکەن و زیان بە ئیدارەی بایدن دەگەیێنێت بۆ فراوانكردنی بازنەی ئاشتی لە ناوچەكەدا."