عێراق 14 ‌هێلیکۆپتەری سەربازیی لە فەڕەنسا دەكڕێت

ئاڤا نیوز 

 

باڵیۆزخانەی فەرەنسا لە بەغدا ئاشکرای کرد، حکومەتی عێراق ڕێککەوتنێکی لەگەڵ کۆمپانیای ئێرباس بۆ کڕینی 14 ‌هێلیکۆپتەری سەربازیی وژۆکردووە و بڕیارە سەرەتای ساڵی 2025 هێلیکۆپتەرەکانی ڕادەستبکرێن.

 

وێنە گەورەکە: لە چوارچێوەی پەرەپێدانی پەیوەندییە سەربازییەکانی نێوان بەغدا و پاریس، ئەمڕۆ پێنجشەممە بەئامادەبوونی سابت عەباسی، وەزیری بەرگریی عێراق و پاتریک دوریل باڵیۆزی فەڕەنسا لە بەغدا، لە بارەگای وەزارەتی بەرگری، کۆمپانیای ئێرباس هێلیکۆپتەرز و نوێنەری هێزی ئاسمانی عێراق ڕێککەوتنێکیان بۆ کڕینی 14 ‌هێلیکۆپتەری سەربازی واژۆکرد.

 

لێدوانی فەرمی: ئارنۆ مۆتالفۆ، بەڕێوەبەری لقی ڕۆژهەڵاتی ناوەڕاستی کۆمپانیای ئێرباس هێلیکۆپتەرز بە ئاژانسی فرانس پرێسی ڕاگەیاندووە، لە سەرەتای ساڵی 2025 هێلیکۆپتەرە سەربازییەکان کە لەجۆری تراز "H225M" بوون، ڕادەستی حکومەتی عێراق دەکرێن.

 

لەلایەکی دیکەوە: پاتریک دوریل باڵیۆزی فەڕەنسا لە بەغدا گووتی: ئەو ڕێککەوتنە دەرئەنجامی گفتوگۆ درێژخایەنەکانی سەرۆککۆماری وڵاتەکەمان و سەرۆکوەزیرانی عێراق بوون، خۆشحاڵین کە ئەم ڕێککەوتنە سەروەری و توانا سەربازییەکانی عێراق بەهێزتر دەکات.

 

باکگراوند: محەممەد شیاع سوودانی، سەرۆکوەزیرانی عێراق لە میانەی سەردانەکەی ساڵی ڕابردووی بۆ پاریس، گفتوگۆی لەگەڵ حکومەتی فەڕەنسا کردبوو بۆ ئەوەی سیستمی ڕادار و فڕۆکەی جەنگی لەجۆری تراز ڕافاڵ و جۆری دیکە بە عێراق بفرۆشێت.