ژمارەیەک بریکاری خۆراک بەهۆی گۆڕینی بەشەخۆراکی هاووڵاتیان سزادەدرێن

ئاڤا نیوز

بەڕێوەبەری بازرگانیی کەلوپەلی خۆراکی هەولێر ڕایگەیاند، پێنج بریکاری خۆراک لەسەر دەستکاریکردنی بەشەخۆراک سزادراون.

 

لێدوانی فەرمی: دلێر عەبدولواحید، بەڕێوەبەری بازرگانیی کەلوپەلی خۆراکی هەولێر بە ئاڤا نیوزی گوت: پێویستە هاووڵاتیان پێش وەرگرتنی بەشەخۆراک سەیری ڕێکەوتی سەر فەردەکە بکەن، چونکە بەشێک لە بریکارەکان فێڵ دەکەن و خۆراکەکە دەگۆڕن و نوێیەکە دەفرۆشن.

 

زانیاریی زیاتر: پێنج بریکاری خۆراک لە کۆیە بەهۆی گۆڕینی بەشەخۆراکی هاووڵاتیان سزادران و پێبژاردنیان پێکراوە، چونکە برنجی نوێیان هێناوەتە هەولێر و فرۆشتوویانە و لەبری ئەوە برنجی کۆنیان بە هاونیشتمانیان داوە.

 

ئەوەی پێویستە بیزانیت: بریکارەکان ئاگادارکراونەتەوە ئەگەر بەشە خۆراکی کۆن و خراپیان بۆ ڕۆشت، بەڕێوەبەرایەتی بازرگانیی کەلوپەلی خۆراک ئاگادار بکەنەوە تاوەکو بۆیان بگۆڕدرێت، بە پێچەوانەوە ئەگەر بەشەخۆراک بگۆڕن سزادەدرێن.

 

ئەمەش بزانە: داوا لە هاووڵاتیان دەکرێت، ئەگەر گومانیان لە گۆڕینی بەشەخۆراکەکەیان کرد، پەیوەندی بە بەڕێوەبەرایەتیی بازرگانیی کەلوپەلی خۆراکی هەولێر بکەن تاوەکو بەدواداچوون بکات.