لە هەرێمی کوردستان ڕێکاری نوێ بۆ ڕێگری لە "ئاوڵەی مەیموون" دەگیرێتەبەر

ئاڤا نیوز

 

 

ناوەندی هاوبەشی قەیرانەکان، لەگەڵ 17 وەزارەتی حکومەتی هەرێمی کوردستان کۆبوونەتەوە و ڕێکاری نوێیان دیاریکردووە بۆ ڕێگریی لە گواستنەوەی ڤایرۆسی ئاوڵەی مەیموون.

 

وێنە گەورەکە: ئەگەرچی لەناوەڕاستی ساڵانی هەشتا، ئاوڵەی مەیموون وەک ڤایرۆسێک دیاریکراوە، بەڵام ئەمساڵ بەشێوەیەکی بەرچاو سەریهەڵداوەتەوە، نیشتمانی سەرهەڵدانی ڤایرۆسەکە ئەفریقایە.

 

لێدوانی فەرمی: سروە ڕەسوڵ، بەڕێوەبەری ناوەندیی هاوبەشی هەماهەنگی قەیرانەکانی JCC بۆ ئاڤا نیوز گوتی: دوێنێ پێنجشەممە لە کۆبوونەوەیەک کە 17 وەزارەت ئامادەی بوون، ڕێکاری نوێ ئامادەکراوە بۆ ڕێگری لە بڵاوبوونەوەی ڤایرۆسی ئاوڵەی مەیموون، ئەگەرچی هیچ پشکنینێکی پێشوەختە نییە، بەڵام ئاگاداریی بە کۆمپانیاکانی هێنانی کرێکاری بیانی دەدرێت بە تایبەت ئەوانەی لە ئەفریقا کارمەند دەهێنن.

 

زانیاریی زیاتر: سروە ڕەسوڵ ئەوەشی گوت: وەزارەتی تەندروستی شوێنی تایبەتی دیاریکردووە بۆ هەر حاڵەتێکی تۆمارکراو، لە هەفتەی داهاتووەوە هەڵمەتێکی هۆشیاری فراوان دەستپێدەکات و لە فڕۆکەخانە و دەروزاەکان ڕێکاری پێویست دەگیرێتەبەر، ئەمەش بەهۆی ئەوەی ڤایرۆسەکە بە ئاسانی دەگوازرێتەوە، بەڵام لەڕێگەی بەکارهێنانی جەلی دژە ڤایرۆس لەناو دەچێت.

 

ئەوەی پێویستە بیزانیت: ئاوڵەی مەیموون Mpox نەخۆشیەکی ڤایرۆسییە، لەڕێگای دەستلێدان و سێکس کردن یان بەرکەوتن بە شلەی جەستەی ئاژەڵی توشبوو دەگوازرێتەوە

 

ئەمەش بزانە: لەماوەی مانگێکدا دوو حاڵەت لە ئوردن تۆمار کراون، بەڵام تائێستا هیچ حاڵەتێک لە عێراق تۆمار نەکراوە.