دەزگای چاودێر: ناتوانین سیمینار ڕێکبخەین

ئاڤا نیوز

 

دەزگای ڕۆشنگەریی چاودێر لە ڕاگەیێنراوێکدا دەڵێت، بەهۆی ئەو دۆخەی دوێنێ دروستبوو کە ئەوان وەک "تاوانی ڕەشی 5ـی ئەیلوول" ناوی دەبەن، ناتوانین سیمینار ڕێکبخەن.

 

ڕاگەیێنراوی فەرمی: ڕۆژی هەینی 06-09-2024 ناوەندی ڕۆشنگەریی چاودێر ڕایگەیاند: ماوەی سێ ساڵ زیاترە بەردەوام هەموو ڕۆژانی شەممەیەک لە ناوەندەکە، سیمیناری فکری، فەلسەفی، سیاسی، ڕووناکبیری و ئەدەبی دەکات، بەڵام بەداخەوە بەهۆی تاوانی ڕەشی 5ـی ئەیلوول کە بەرامبەر ناوەندی ڕۆشنگەریی چاودێر کرا، ئەم شەممەیە سیمینارەکە ناکرێت".

 

زانیاریی زیاتر: بەگوێرەی ڕاگەیێنراوەکەی ناوەندی چاودێر، بڕیار بووە سیمینارەکەی بەیانی بۆ ئەبوبەکر کاروانی بێت، بەڵام داوای لێبووردن دەکەن و بەڵێن دەدەن هەفتەی داهاتوو سیمینارەکان دەستپێبکەنەوە.

 

ئەوەی پێویستە بیزانیت: کاتژمێر 05:00ـی ئێوارەی دوێنێ هێزێکی کۆماندۆی یەکێتی دەستی بەسەر باڵەخانەی دەزگای چاودێر لە گردی ئەندازیارانی شاری سلێمانیدا گرت کە هەریەکە لە ڕادیۆی مەدەنیەت، پلاتفۆرمی دابڕان، بنکەی گەلاوێژ، ماڵپەڕی گەلاوێژ، ماڵپەڕی چاودێر، ماڵپەڕی ڕوانگە و ڕەخنە، پڕۆژەی پەیکەرسازیی چاودێر، گەلەری چاودێر، هۆڵی کۆنفراسی "شەهید ئازاد هەورامی" و کتێبخانەیەک کە 10 هەزار سەرچاوەی تێدایە، هەبوون.