هەولێر و بەغدا  مووچە و بودجە و پرسە هەڵپەسێردراوەکان تاوتوێ دەکەن

ئاڤا نیوز

کۆمەڵێک پرس لە نێوان هەولێر و بەغدا پێویستیان بە لێکتێگەیشتن و گفتوگۆیە، بڕیارە لە کۆبوونەوەی هەردوو ئەنجوومەنی ئابووریی عێراق و هەرێمی کوردستان گفتوگۆیان لەبارەوە بکرێت.

وێنە گەورەکە: ڕۆژی یەکشەممە 8-9-2024، بەسەرۆکایەتیی سەرۆکوەزیران مەسرور بارزانی، هەردوو ئەنجوومەنی وەزاریی عێراق بۆ کاروباری ئابووری و ئەنجوومەنی ئابووریی هەرێمی کوردستان لە هەولێر زنجیرەیەک کۆبوونەوە دەکەن، دوو ڕۆژ دەخایەنن و کۆمەڵێک پرس تاوتوێ دەکەن. 

بابەتە ستراتیژییەکان: ئاڤا نیوز زانیویەتی پرسەکانی مووچە، بودجە، شایستە داراییەکانی هەرێمی کوردستان، بابەتی خاڵە سنوورییەکان، گومرگ و باج  و کێشە هەڵپەسێردراوەکانی نێوان هەردوولا باس دەکرێن و هەوڵی چارەسەرکردنیان دەدرێت.
 
لەلایەکی دیکەوە: جگە لە کۆبوونەوە سەرەکییەکان بە ئامادەبوونی سەرجەم ئەندامانی هەردوو ئەنجوومەنەکە، وەزیرە هاوتاکان کۆبوونەوەی تایبەتیان دەبێت و لەسەر پرسە پەیوەندیدارەکانی وەزارەتەکانیان گفتوگۆ دەکەن.

زانیاریی زیاتر: یەکێک لە گرنگترین کۆبوونەوەکان لەنێوان تەیف سامی، وەزیری دارایی عێراق و ئاوات شێخ جەناب، وەزیری دارایی و ئابووری هەرێمی کوردستان دەبێت لەبارەی؛ کێشەکانی لیستی مووچە، لەوانە بایۆمەتری، ناوی دووبارە و هاوشێوە و مووچەی فەرمانبەرانی سنووری ماددەی 140.

 

باکگراوند: ئێوارەی ئەمڕۆ شاندی عێراق بەسەرۆکایەتیی د.فوئاد حوسێن، کە لە وەزیرانی  دارایی، بازرگانی، کشتوکاڵ، پلاندانان و پارێزگاری بانکی ناوەندی پێکهاتبوو، گەیشتە هەولێر و بۆ کۆبوونەوەکان ئامادەن.