وادەی سەردانەکەی پزیشکیان بۆ عێراق و هەرێمی کوردستان ڕاگەیێنرا

ئاڤا نیوز 

 

میدیای فەرمی ئێران بڵاوی کردەوە، لە یەکەم سەردانی دەرەوەیدا لە دوای دەستبەکاربوونی، ڕۆژی چوارشەممە سەرۆککۆماری وڵاتەکەیان سەردانی عێراق دەکات و لەگەڵ بەرپرسانی باڵای ئەو وڵاتە کۆدەبێتەوە.

 

وێنە گەورەکە: 8ـی تەمموزی ئەمساڵ محەممەد شیاع سوودانی، سەرۆکوەزیرانی عێراق بانگهێشتنامەیەکی ئاراستەی مەسعود پزیشکیان، سەرۆککۆماری ئێران کرد بۆ ئەوەی سەردانی بەغدا بکات بە ئامانجی "بەهێزکردنی پەیوەندییە دووقۆڵییەکان و گفتوگۆکردن لەسەر ژمارەیەک دۆسیەی گرنگ".

 

زانیاری بەدەستهاتوو: ئاژانسی هەواڵی ئیرنا کە ئاژانسی فەرمی ئێرانە بڵاوی کردەوە، مەسعود پزیشکیان، سەرۆککۆماری ئێران ڕۆژی چوارشەممە یەکەمین گەشتی دەرەوەی وڵاتی بۆ عێراق ئەنجام دەدات و لەپاڵ کۆبوونەوەی لەگەڵ بەرپرسانی باڵای ئەو وڵاتە، "ژمارەیەک یاداشتی لێکتێگەیشتن و هاوکاریش لە بواری ئەمنیی لەنێوان هەردوولادا واژۆ دەکات".

 

لەلایەکی دیکە: محەممەد کازم ئال سادق، باڵیۆزی ئێران لە عێراق پلانی سەردانەکەی پزیشکیانی ئاشکرا کردووە و ئەوەی خستووەتەڕوو، پزیشکیان دوای کۆبوونەوەی لەگەڵ بەرپرسانی عێراق لە بەغدا، سەردانی نەجەف و کەربەلا دەکات، "ئەگەر دۆخەکەش گونجاو بێت، سەردانی بەسرە و هەولێریش دەکات".

 

باکگراوند: پێشتر لەلایەن نێچیرڤان بارزانی، سەرۆکی هەرێمی کوردستان بانگهێشتنامەی فەرمی پێشکەشی ئیبراهیم ڕەئیسی، سەرۆککۆماری کۆچکردووی ئێران کرابوو بۆ ئەوەی سەردانی هەولێر بکات، لە ڕێوڕەسمی دەستبەکاربوونی مەسعود پزیشکیانیش وەک سەرۆککۆماری نوێ،  نێچیرڤان بارزانی بانگهێشتنامەی پێشکەشی ناوبراو کرد.