شاندی باڵای عێراق و بەرپرسانی هەرێمی كوردستان لە كۆبوونەوەدان

ئاڤا نیوز

 

 

کۆبوونەوەی شاندی باڵای عێراق و بەرپرسانی هەرێمی کوردستان دەستی پێکردەوە.

 

وێنە گەورەکە: ئەمڕۆ یەکشەممە 8-9-2024، بە ئامادەبوونی سەرۆکوەزیران بارزانی، کۆبوونەوەی هەردوو ئەنجومەنی وەزاریی عێراق بۆ ئابووری و ئەنجوومەنی ئابووریی هەرێمی کوردستان لە شاری هەولێر بەڕێوەچوو.

 

زانیاریی بەدەستهاتوو: نیوەڕۆی ئەمڕۆ بەشی یەكەمی كۆبوونەوەكە بەڕێوەچوو و پاشان پشوو درایە بەشداربووان، كەمێك پێش ئێستا جارێكی دیكە كۆبوونەوە دەستی پێكردەوە، بەپێی زانیارییەكان، شاندی باڵای عێراق و بەرپرسانی هەرێمی كوردستان دابەشی چەند گرووپێك دەبن بۆ ئەوەی هەر گرووپێك گفتوگۆ لەبارەی یەكێك لە تەوەرەكان بكات.

 

لەلایەکی دیکەوە: لە دەستپێکی بەشی یەكەمی كۆبوونەوەكەدا سەرۆکوەزیران بارزانی ڕایگەیاند: ئەگەر خواست و ویستی چارەسەر هەبێت، چارەسەرکردنی کێشەکان ئاسانە و پێویستە ڕێزگرتن لە دەستوور بگیرێت و ڕێککەوتنەکان بنەما بێت بۆ چارەسەرکردنی هەموو کێشە و ناکۆکییەکان. 

 

زانیاریی تایبەت: بەپێی زانیارییەكانی ئاڤا نیوز شاندی باڵای عێراق و بەرپرسانی هەرێمی كوردستان لەسەر چەند خاڵێك گەیشتوونەتە ڕێككەوتنی سەرەتایی بەڵام گفتوگۆ لەسەر تەوەرەكانی دیكە هێشتا بەردەوامە و كۆبوونەوەكەی ئەمشەو چەند كاتژمێرێك دەخایەنێت.

 

ئەوەش بزانە: ئەو بابەتانەی خوارەوە تەوەری سەرەكیی كۆبوونەوەكانن و گفتوگۆیان لەبارەیەوە دەكرێت:

پرسی دارایی: تێبینییەکانی بەغدا لەبارەی لیستی مووچە و ڕادەستکردنی داهاتەکان

گومرگ و بازرگانی: چارەسەری ڕاگرتنی هەناردەی بەرهەمی کۆمپانیاکانی هەرێمی کوردستان لە ڕێگەی دەروازە سنوورییەکانەوە بۆ پارێزگاکانی عێراق.

کشتوکاڵ: هەناردەی بەرهەمی نێوخۆییەکان و ناردنی پارەی گەنمی جووتیاران، هاوکات بەهێزکردنی هەماهەنگی بۆ برەودانی زیاتر بە کەرتی کشتوکاڵ و یەکخستنی ڕێکارەکان بۆ قەدەغەی هاوردەی بەرهەمی دەرەکی بەگوێرەی پێویستی و زیادکردنی پشتیوانی بۆ بەرهەمی ناوخۆ.