هاوكاریی سەرۆكوەزیران بارزانی بەسەر زیانلێكەوتووانی بازاڕی قەیسەریدا دابەش دەکرێت

ئاڤا نیوز

 

لە ڕێوڕەسمێكدا هاوكاریی دارایی سەرۆكوەزیران بارزانی بەسەر زیانلێكەوتووانی بازاری قەیسەریی شاری هەولێر دابەش كرا.

 

وێنە گەورەکە: بازاڕی قەیسەریی هەولێر، یەكێك بوو لەو دەیان بازاڕ و شوێنەی هەرێمی کوردستان کە لەلایەن باندێكی سەر بە پەكەكە سووتێنران و بەهۆیەوە سەدان دووكاندار زەرەرمەند بوون. دواتر بە بڕیاری سەرۆکوەزیران بارزانی بڕی پێنج ملیار و 300 ملیۆن دینار بۆ نۆژه‌نكردنه‌وه‌ی تەرخان کرا. 

 

ڕاگەیێنراوی فەرمی: بەپێی راگەیێنراوێكی پارێزگای هەولێر، لە ڕێوڕەسمەكەدا ئومێد خۆشناو، پارێزگاری هەولێر ڕایگەیاند: "سەرۆكوەزیران بارزانی، لەهەموو لایەک زیاتر پەرۆش بوو بۆ ئاشكراكردنی بكه‌رانی تاوانى سووتاندنى بازاڕى قەیسەرى و هاوكاریکردن و پشتیوانیکردنى كاسبكاران، سوپاس بۆ خودا تاوانباران ئێستا دەستگیرکراون و ناسنامەیان ئاشکرا بوو، ئێستاش دەستکراوە بە هاوکاریکردنى ئێوە".

 

ئەوەش بزانە: پڕۆسەى نۆژەنکردنەوەى بازاڕى قەیسەرى زۆر بەباشى کارى تێدا دەکرێت، بەپێی گوتەی پارێزگاری هەولێر لە زووترین کاتدا کارەکان بە کۆتا دێن و قەیسەرى دەگەڕێتەوە سەر دۆخی جارانی.

 

ئەوەی پێویستە بیزانیت: ئەو هاوكارییەی ئەمشەو پێشکەش بە دووکاندارانى بازاڕەکە کرا، لە نێوان ( 2 تاکو 20 ملیۆن دینار ) بوو. لەبەشێکی دیکە هاوکارییەکەدا زیانلێکەوتووانى بازاڕەکە بۆ ماوەی یەك ساڵ لە پارەی ئاو و كارەبا و تابلۆ و خاشاك دەبەخشرێن، هەروەها لە باجی 2023 بە رێژەی 50% و لە باجی 2024 یش بە رێژەی 100% بەخشراون.