بەڕێوەبەری کۆچ و کۆچبەران: گەڕانەوەی ئاوارەکانی هەرێمی کوردستان ئارەزوومەندانەیە

ئاڤا نیوز

وەزارەتی کۆچ و کۆچبەرانی عێراق 31-7-2024ـی وەک دوا وادە بۆ گەڕانەوەی تەواوی ئاوارەکان و داخستی کەمپەکانی هەرێمی کوردستان دیاری کردبوو، بەڵام تاوەکو ئێستا کەمپەکان ئاوارەیان تیادا ماوە و دانەخراون.

وێنە گەورەکە: لە سنووری پارێزگای هەولێر شەش کەمپی ئاوارەکان هەیه، کە پێکهاتوون لە کەمپی حەسەن شام(U2)، حەسەن شام(U3)، خازر(M1)، دیبەگە(1)، هەرشەم و بەحرکە، کۆی گشتی ژمارەی خێزانی ئاوارەکانی سنووری هەولێریش چوار هەزار و 285 خێزان دەبێت، کە سەرجەمییان 21 هەزار و 200 کەسە.

لێدوانی فەرمی: ناز جەلال، بەڕێوەبەری کۆچ و کۆچبەران و وەڵامدانەوەی قەیرانەکانی پارێزگای هەولێر، بە ئاڤا نیوزی ڕاگەیاند: "لەو کاتەی ئاوارەکان هاتوون بۆ هەرێمی کوردستان، هاوکاری کراون و شوێنیان بۆ دابینکراوە لەلایەن حکومەتی هەرێمی کوردستان، هیچ کات فشاریان لەسەر نەکراوە و بەهەموو شێوەیەک ڕێزیان لێگیراوە، بەڵام ئێمە لەگەڵ گەڕانەوەی ئارەزوومەندانەی ئاوارەکانین و هاوکاریشیان دەکەین ئەگەر بگەڕێنەوە".

زانیاری زیاتر: ناز جەلال، دەڵێت: وەزارەتی کۆچ و کۆچبەرانی عێراق 31-7-2024ـی وەکو کۆتا وادە بۆ چۆڵکردنی کەمپەکان دیاری کردبوو، بەڵام پێداچوونەوە بە بڕیارەکە کراوە و وادەکەی درێژ کراوەتەوە بۆ کاتێکی نادیار.  

ئەوەی پێویستە بیزانیت: کۆی گشتی ژمارەی ئاوارەکان لە ناوەوە و دەرەوەی کەمپەکانی سنووری پارێزگای هەولێر بەم شێوەیە، ئاوارەکانی ناو کەمپ چوار هەزار و 285 خێزانە، ئاوارەکانی دەرەوەی کەمپیش37 هەزار 546 خێزانە.