پارێزگاری بانکی ناوەندی بۆ سەرۆکوەزیران بارزانی: بەردەوامیی 'هەژماری من' گرنگە

ئاڤا نیوز

 

 عەلی عەللاق، پارێزگاری بانکی ناوەندیی عێراق لە کۆبوونەوەیدا لەگەڵ سەرۆکوەزیران بارزانی، جەختی لەسەر گرنگی بەردەوامبوونی پڕۆژەی هەژماری من و پشتیوانیی و چاودێریی بانکی ناوەندی کردەوە.

 

وێنە گەورەکە: ئەمڕۆ دووشەممە 09-09-2024 سەرۆکوەزیران بارزانی پێشوازی لە عەلی موحسین عەللاق، پارێزگاری بانکیی ناوەندیی عێراق کرد و باسیان لە پڕۆژەی هەژماری من کرد. 

 

زانیاریی زیاتر: سەرۆکوەزیران بارزانی تیشکی خستە سەر چاکسازییەکان لە بواری بانکی لە هەرێمی کوردستان، هەروەها ئاماژەی بە پڕۆژەی ( هەژماری من) کرد کە تاوەکو ئێستا زیاتر لە نیو ملیۆن کەس لە مووچەخۆرانی کەرتی گشتی تۆمارکراون و پێشبینی دەکرێت لە مانگی داهاتوودا مووچەی دووسەد هەزار کەس لە ڕێگەی (هەژماری من )ـەوە بدرێت.

 

لەلایەکی دیکەوە: هەردوولا هاوڕابوون لە سەر گرنگی بەردەوامبوونی پڕۆژەکە و پشتیوانی و چاودێریی بانکی ناوەندی. 

 

ئەوەی پێویستە بیزانیت: سەرۆکوەزیران بارزانی سوپاسی پارێزگاری بانکی ناوەندی کرد بۆ پاڵپشتیکردنی تایبەتی خۆی لە هەژماری من و چاکسازییە بانکییەکانی حکومەتی هەرێمی کوردستان، هەروەها باسی لە گەشەکردنی خواستی دامەزراوە داراییە ناوخۆیی و نێودەوڵەتییەکان بۆ هەماهەنگیکردن و پشتگیریکردن لە ستراتیژیی حکومەتی هەرێمی کوردستان لە بواری داراییدا کرد.

 

گۆشەیەکی دیکەی دیمەنەکە: خێراترکردنی گشتگیری دارایی لە هەرێمی کوردستان وەک بەشێک لە ئامانجە ستراتیژییەکانی بانکیی ناوەندیی عێراق و هەنگاوەکانی بە دیجیتەڵکردنی بانکەکان، تەوەرێکی دیکەی گفتوگۆکان بوو.