هەولێر و بەغدا ڕاگەیێنراوێکی هاوبەش دەردەکەن: هەواڵی خۆش بەڕێوەیە

ئاڤا نیوز

 

 

کۆبوونەوەی هەردوو ئەنجوومەنی ئابووریی عێراق و هەرێمی کوردستان  كۆتاییان هات. بەرپرسێکی باڵای هەرێمی کوردستانیش دەڵێت، هەواڵی خۆش بەڕێوەیە.

 

وێنە گەورەکە: ڕۆژانی شەممە و یەکشەممە 08 و 09-09-2024 بە سەرپەرشتیی سەرۆکوەزیران بارزانی، ژمارەیەک کۆبوونەوە لەنێوان هەردوو ئەنجوومەنی وەزاریی عێراق بۆ ئابووری و ئەنجوومەنی ئابووریی هەرێمی کوردستان لە شاری هەولێر بەڕێوەچوو.

 

لێدوانی فەرمی: هێمن میرانی، سەرۆکی دیوانی وەزارەتی ناوخۆی هەرێمی کوردستان لەبارەی ئەنجامی کۆبوونەوەی هەردوو ئەنجوومەنی ئابووریی عێراق و هەرێمی کوردستان کە دوو ڕۆژە بەسەرپەرشتیی سەرۆکوەزیران بارزانی لەبارەی پرسە هەڵپەسێردراوەکان بەتایبەت مووچە و بودجە کۆبوونەوە دەکەن، لە پەیامێکی تایبەتدا ڕایگەیاند: ڕاگەیێنراوێکی هاوبەش لە کۆبوونەوەی تیمی هاوبەشی نێوان هەردوو حکومەت دەردەچێت و هەواڵی خۆشی تێدایە.

 

زانیاریی بەدەستهاتوو: ئێوارەی ئەمڕۆ دووشەممە، دوای تەواوبوونی كۆبوونەوەكە ئەندامانی شاندە باڵاكەی عێراق لەلایەن سەرۆكوەزیران بارزانییەوە ماڵئاواییان لێكرا و گەڕانەوە بەغدا.

 

لەلایەكی دیكەوە: پێشەوا هەورامانی، گوتەبێژی حكومەتی هەرێمی كوردستان سەبارەت بە ئەنجامی كۆبوونەوەكان بە ئاڤا نیوزی ڕاگەیاند: ھەردوو ئەنجوومەنی وەزاریی ئابووریی ھەرێمی كوردستان و عێراق لە بارەی پرسی مووچە ڕێککەوتن کە حکومەتی فیدڕاڵ مانگانە مووچەی فەرمانبەران ڕەوانە بکات و لە بەرانبەردا حکومەتی ھەرێمی كوردستان تاوەکو سەری ساڵ کێشە تەکنیکییەکان چارە بکات.

.