داوا لە مامۆستایانی وانەبێژ دەکرێت ئاگاداری مۆبایلەکانیان بن

ئاڤا نیوز

 

دوای 18 ڕۆژ وردبینیکردن لە ناوی مامۆستایانی وانەبێژی قوتابخانەکان بۆ ئەوەی بە گرێبەست دابمەزرێن، ئەمڕۆ هەینی کۆتایی بە پڕۆسەی وردبینیکردن هێنرا، بڕیارە ڕۆژی دووشەممە لیستی ناوەکانیان ڕەوانی ئەنجوومەنی وەزیران بکرێت.

 

وێنە گەورەکە: سەرۆکوەزیران مەسرور بارزانی لەماوەی ڕابردوودا لەگەڵ نوێنەرانی مامۆستایانی وانەبێژان کۆبووەوە و بڕیاری دا لەسەر داهاتی ناوخۆی حکومەتی هەرێمی کوردستان بکرێنە گرێبەست، کە ژمارەیان نزیکەی 38 هەزار کەسە و  و مووچەیان بەمشێوەیە دەبێت: دیبلۆم 400 هەزار دینار: بەکالۆریۆس: 500 هەزار دینار .

 

لێدوانە فەرمییەکان: د.ئالان حەمەسەعید، وەزیری پەروەدە بە ئاڤا نیوزی ڕاگەیاند: ئەمڕۆ هەینی پڕۆسەی وردبینی لە ناوی وانەبێژان تەواو بووە و ڕۆژی دووشەممە ڕەوانەی ئەنجوومەنی وەزیران دەکرێت تاوەکو فەرمانی بۆ دەربکرێت.

 

لەلایەکی دیکەوە: مامۆستا عەلی ڕەئوف، نوێنەری گشتیی مامۆستایانی وانەبێژ بە ئاڤا نیوزی ڕاگەیاند: "داوا لە مامۆستایانی وانەبێژ دەکەین ئاگاداری مۆبایلەکانیان بن، چونکە پەیوەندییان پێوە دەکرێت بەمەبەستی پشتڕاستکردنەوەی زانیارییەکانیان، لەهەوڵداین بۆ مووچەی مانگی نۆ مووچەیان خەرج بکرێت".

 

ئەمەش بزانە: هاوکات لەگەڵ دامەزراندنی وانەبێژانی وەزارەتی پەروەردە، بڕیاری دامەزراندن بۆ مامۆستایانی وانەبێژی زانکۆ و پەیمانگەکانیش دەرکراوە کە ژمارەیان نزیکەی دوو هەزار وانەبێژ دەبێت و ئێستا کاری پێویستی بۆ دەکرێت. مووچەی ئەوانیش لەنێوان 500  هەزار بۆ ملیۆنێک و 200 هەزار دینار دەبێت.