حووسییەکان کەشتییەک دەکەنە ئامانج کە نەوتی عێراقی هەڵگرتبوو

ئاڤا نیوز

 

بەئامانجگرتنی کەشتییەکی نەوتی عێراق لەلایەن حوسییەکان، هەڕەشەی کارەساتی ژینگەیی لە دەریای سوور دروست دەکات و هێزە دەریاییەکانی یەکێتیی ئەوروپاش هۆشداری دەدات.

 

وێنە گەورەکە: حوسییەکانی یەمەن لە دەریای سوور هێرش دەکەنە سەر کەشتییەکی نەوتهەڵگر، کە یەک ملیۆن بەرمیل نەوتی عێراقی هەڵگرتووە و دوای دوو ‌‌هێرش کەشتییەکە ئاگر دەگرێت. شارەزایانیش هۆشداریی لە کارەساتی ژینگەیی دەدەن.

 

ڕاگەیێنراوی فەرمی: هێزی دەریایی یەکێتیی ئەوروپا لە ڕۆژهەڵاتی ناوەڕاست ڕایگەیاند، بەمنزیکانە ئۆپەراسیۆنێکی ڕزگارکردن بۆ کەشتییە عێراقییەکە ئەنجام دەدەن، ئەم کەشتیە لەلایەن حوسییەکانەوە کراوەتە ئامانج و چەند ڕۆژێکە لە دەریای سوور بەردەوام دەسووتێت، بەڵام هیچ نیشانەیەکی ڕوون نییە بۆ دزەکردنی نەوتەکەی بۆ ناو دەریا.

 

باکگراوند: کەشتی نەوتهەڵگری (سۆونیۆن) نزیکەی یەک ملیۆن بەرمیل نەوتی خاوی لە عێراق بارکردووە، دوای ئەوەی ویستی بگاتە دەریای سوور، لە 21ـی ئاب لە کەناراوەکانی یەمەن بە مووشەک کرایە ئامانج، پاشان لە 23ـی ئاب هێرشێکی دیکەی کرایە سەر و بووە هۆی ئاگرکەوتنەوە، تائێستا سووتانی نەوتەکەی بەردەوامە.