لە ڕواندز زۆنێکی گەشتیاری بە ستانداردی جیهانی دروست دەکرێت

 

ئاڤا نیوز

 

حکومەتی هەرێمی کوردستان بە هاوبەشی لەگەڵ کەرتی تایبەت، زۆنێکی گەشتیاری بە گوژمەی زیاتر لە دوو ملیار دۆلار بە ستانداردی جیهانی لە قەزای ڕواندز و دەوروبەری جێبەجێ دەکات.

 

وێنە گەورەکە: ڕواندز یەکێک لە ناوچە گەشتیارییە دیارەکانی هەرێمی کوردستانە، چەندین سەیرانگە و پرۆژەی گەشتیاری لەخۆدەگرێت و ساڵانە دەیان هەزار گەشتیار سەردانی دەکەن، حکومەت ناوچە گەشتیارییەکان ڕێکدەخاتەوە و تایبەتمەندیی جیهانییان بۆ زیاد دەکات، چەندین پرۆژەی گەشتیاری نوێ دروست دەکرێن و ناوچەکە دەبێتە زۆنێکی گەشتیاریی فراوان.

 

لێدوانی فەرمی: بەرگەشت ئاکرەیی، گوتەبێژی دەستەی وەبەرهێنان بە ئاڤا نیوزی گوت: زۆنەکە خەرەندی ڕواندز و دەوروبەری، بێخاڵ، گەلی عەلی بەگ، چیای کۆڕەک تاوەکو سپیلک دەگرێتەوە، سەرجەمیان ڕێکدەخرێنەوە و تایبەتمەندیی جیهانی و سەرنجڕاکێشیان بۆ زیاد دەکرێت.

 

ئەوەی پێویستە بیزانیت: پرۆژەکە لەلایەن حکومەت و کەرتی تایبەت جێبەجێ دەکرێت، گوژمەی زیاتر لە دوو ملیار دۆلاری بۆ تەرخان دەکرێت، لەلایەن ئەندازیارانی ناوخۆ و بیانی دیزاین کراوە و 90%ی ماستەرپلانی تەواوکراوە.

 

ئەمەش بزانە: چەندین پرۆژەی نوێی گەشتیاری لە ناوچەکە دروست دەکرێن، یەکێک لەوان دروستکردنی بەرزەپردێکی شووشەیە و ڕواندز و چیای هەندرێن بەیەکەوە دەبەستێتەوە.