ئێسکەپەیکەری ئاژەڵێکی دەگمەن لە کەرکووک دەدۆزرێتەوە

ئاڤا میدیا 

لە گوندێكی سنووری ناحیەی شوان لە پارێزگای كەركووك، ئێسكەپەیكەری گیانەوەرێك دەدۆزرێتەوە و لێكۆڵەرانیش پێشبینی دەكەن هی دایناسۆر بێت.

چیرۆكی سەرەكی: لە گوندی مامڕەش لە سنووری ناحیەی شوان لەكاتی هەڵكەندن و چاككردنی ڕێگای سەرەكیی گوندەكە، لەلایەن گوندشینانەوە ئێسكەپەیكەرێك دەدۆزرێتەوە و تیمێكی ئیتاڵی دەڵێن گومان دەکرێت شوێنەوارەكە ئێسكەپەیکەری دایناسۆر بێت.

زانیاریی پەیامنێر: زریان كەمال، پەیامنێری ئاڤا میدیا جگە لە سەردانی گوندەكە، بەدواداچوونی كردووە و دەڵێت، بەپێی گوتەی ئەو پسپۆرانەی لێكۆڵینەوەیان كردووە، ئێسكەپەیكەرەكە دایناسۆری جۆری تیرانسۆرە یاخود هی ئاژەڵی مامووسە.

لێدوانی فەرمی: شوێنەوارناس د.شوان محەممەد بە ئاڤانیوزی ڕاگەیاند: "دۆزینەوەی هەر پارچەیەكی شوێنەواری لەسەر ئەو خاكەی ئێستا پێی دەگوترێت كوردستان، نیشانەی ئەوەیە ناوچەكەی ئێمە یەكێكە لە كۆنترین لانكەكانی شارستانییەت و ژیان چ مرۆڤ بێت یاخود ئاژەڵ، ئەمە زۆر گرنگە بۆ كوردستان، چونكە چاوی ناوەندە زانستییە جیهانییەكان بۆ توێژینەوە دێتە سەر ئێرە".

لەلایەكی دیكەوە: موبارەك ئیسماعیل، دانیشتووی گوندەكە با ئاڤا نیوزی ڕاگەیاند: "ڕێگایەك خراپ بوو ویستمان چاكی بكەین، دەمی شۆفڵمان لێدا ئێسكێكی قەبارە گەورە دەركەوت، هەرچەندە زیاتر گەڕاین پارچە ئێسكی زیاترمان دۆزییەوە و لایەنی پەیوەندیدارمان لێ ئاگادار كردەوە".

باكگراوند: تیرانۆسۆر بە یەكێك لە دڕندەترین جۆرەكانی دایناسۆر دادەنرێت و نزیكەی 70 ملیۆن  ساڵ بەر لە ئێستا ژیاوە، هەرچی ئاژەڵی مامووسیشە سەر بە توخمی فیلە تەمەنی دەگەڕێتەوە بۆ یەك ملیۆن ساڵ لەمەوبەر.