سی ئێن ئێن: دوو لایەنی ئیسرائیلی لەپشت تەقینەوەکانی لوبنانن

ئاڤا نیوز

 

ئاژانسی سی ئێن ئێنی ئەمریکی ئاشکرای دەکات، هەرچەندە ئیسرائیل بێدەنگی هەڵبژاردووە، بەڵام هەردوو دەزگای هەواڵگریی مۆساد و سوپای ئیسرائیل لەپشت تەقینەوەکانی دوێنێی لوبنانەوە بوون.

 

وێنە گەورەکە: دوێنێ هەزاران ئامێری بێتەلی دەست ئەندامانی حیزبوڵڵای لوبنان تەقینەوە و لە ئەنجامیشدا نۆ کەس کوژران، 2800 کەسیش برینداربوون کە برینی 200 کەسیان سەختە، تەقینەوەکانیش کاردانەوەی نێوخۆیی و نێودەوڵەتی بەدواداهات.

 

زانیاریی بەدەستهاتوو: ئاژانسی سی ئێن ئێنی ئەمریکی بڵاویکردەوە، ئەو تەقینەوانە کە ئەندامانی حیزبوڵڵای لوبنانی بەئامانج گرت، دەرئەنجامی ئۆپەراسیۆنێکی هاوبەشی نێوان دەزگای مۆساد و سوپای ئیسرائیل بووە، بەبێ ئەوەی زانیاریی زیاتر لەسەر پەیوەندی ئیسرائیل بە تەقینەوەکان بخاتەڕوو. 

 

لەلایەکی دیکەوە: بەرپرسێک لە نووسینگەی ڕاگەیاندنی حیزبوڵڵای لوبنانی بە ئاڤا نیوزی ڕاگەیاند: "ئێمە گومانمان لەوە نییە کە ئیسرائیل لەپشت تەقینەوەی ئامێرەکانی پەیوەندییەوە بووە، ئێمە بەتەواوەتی لەوە دڵنیاین، بۆیەش سیناریۆکانی وەڵامدانەوەی ئەو ڕووداوە لای مقاوەمە دەبێت و بەدڵنیاییەوە وەڵام دەدرێتەوە".