کورد، تورکمان و سوننە لەبارەی پڕۆژەیاسای گەڕاندنەوەی زەوییە کشتوکاڵییەکان ناکۆکن

ئاڤا نیوز

 

دوایین کۆبوونەوەی کورد، تورکمان، سوننە و شیعەکان لەسەر پڕۆژەیاسای گێڕانەوەی زەوییە کشتوکاڵییەکان بێ گەیشتنە ڕێککەوتن کۆتاییهاتووە، کورد، تورکمان و شیعەکان پشتیوانی پڕۆژەکەن و سوننەکانیش سەرنجیان لەسەر چەند بڕگە و ماددەیەک هەیە.

 

زانیاری بەدەستهاتوو: بەگوێرەی زانیارییەکانی ئاڤا نیوز، لە کۆبوونەوەی شەوی ڕابردووی لایەنە کوردستانی و شیعییەکان لەگەڵ لایەنەکانی سوننە تایبەت بە پڕۆژەیاسای گەڕاندنەوەی زەوییە کشتوکاڵییەکان بۆ جووتیارە ڕەسەنەکان، لایەنەکان نەگەیشتوونەتە ڕێککەوتن.

 

زانیاریی زیاتر: لە کۆبوونەوەکەدا سوننەکان تێبینی خۆیان لەسەر پڕۆژەیاساکەدا هەبووە و پێیان وابووە جووتیارانی عەرەبی کەرکووک و ناوچەکانی دیکەی سنووری ماددەی 140 لە یاساکەدا زیانمەند دەبن و قەرەبووش ناکرێنەوە، بەڵام کورد و تورکمان کۆدەنگن لەسەر تێپەڕاندنی یاساکە.

 

لەلایەکی دیکەوە: فراکسیۆنە کوردستانی و تورکمانییەکان کۆتایی ئەم هەفتەیەیان وەک دوا وادە بۆ ڕێککەوتن لەسەر پڕۆژەیاسای گەڕاندنەوەی زەوییە کشتوکاڵییەکان داناوە، بەپێچەوانەوە داوا دەکەن بە دەنگی زۆرینە لە پەرلەمانی عێراق پەسەندبکرێت.