کارگەی سلیڤانا بۆ بە بازاڕکردنی گەنمی جووتیاران لە زاخۆ كرایەوە

ئاڤا نیوز 

 

سەرۆكوەزیران مەسرور بارزانی، لە ڕێوڕەسمێكدا كارگەی سلیڤانای بۆ بە بازاڕكردنی گەنمی جووتیاران كردەوە.

 

وێنە گەورەکە: سیلڤانا کارگەیەکی بەرهەمهێنانی بەرهەمە گەنمییەکان، هاوکات کارگەکە لەسەر 18 دۆنمی زەوی دروستکراوە، ڕۆژانە هەزار تۆن ئارد لەم کارگەیە بەرهەم دێت.

 

لێدوانی فەرمی: سەرۆكوەزیران مەسرور بارزانی لەڕێوڕەسمەكەدا گوتی: هەوڵمان داوە گرنگییەكی تایبەت بە كەرتی چاندن و پیشەسازیی خواردن بدەین، لە ساڵانی ڕابردوو چەندین پڕۆژەی چاندن و كشتوكاڵ ئەنجام دراوە.

 

"ئێمە بەكردار دەستمان بە دۆزینەوەی بازاڕی ناوخۆیی و دەرەوە بۆ بەرهەمی جووتیارانی هەرێمی كوردستان كردووە، ئەمڕۆ چەندین بەرهەمی جووتیارانمان دەگاتە بازاڕەكانی عەرەبی و ئەورووپی و پێویستە و زۆر گرنگە جووتیارانمان زیاتر خۆیان پێشبخەن و ئاستی كوالێتیی بەرهەمەكانیان بەرز ڕابگرن" سەرۆکوەزیران وای گوت.

 

لە لایەکی دیکەوە: سەرۆکوەزیران ئەوەشی خستەڕوو کە كشتوكاڵ یەكێکە لە تەوەرە گرنگەكانی بەرنامەی حکومەت بۆ هەمەجۆركردنی ئابووریی كوردستان، ئامانجیانە كۆمەڵگە لە بەكارهێنەرەوە ببێتە بەرهەمهێنەر.

 

بۆچی گرنگە؟ کردنەوەی ئەو کارگەیە دەبێتە پاڵنەرێکی گرنگ و سەرەکی بۆ کەرتی ئابووری و کشتوکاڵی، زیاتر لە 200 دەرفەتی کار دابین دەکات، هەروەها کار لەسەر بەرهەمە ناوخۆییەکان دەکات و هەناردەی دەرەوەی وڵاتیشی دەکات.