ئێران پەردە لەسەر نوێترین مووشەکی بالیستیک لادەبات

ئاڤا نیوز

 

لە نمایشێکی سەربازیدا و بە ئامادەبوونی مەسعوود پزیشکیان، سەرۆککۆماری ئێران  پەردە لەسەر نوێترین مووشەکی بالیستیکی لادرا.

 
وێنە گەورەکە: ڕۆژی شەممە 21-9-2024، لە نمایشێکی سەربازیدا پەردە لەسەر نوێترین مووشەکی بالیستیک و فڕۆکەیەکی بێفڕۆکەوانی هێرشبەری ئێران لادرا، ئەمەش لەکاتێکدایە کە گرژییەکانی ناوچەکە لە زیادبوون دایە، لەهەمان کاتدا دەستی تۆمەت بۆ ئێران درێژ دەکرێت بەهۆی هاوکارییە سەربازییەکانی بۆ ڕووسیا لە دژی ئۆکراینا.

 

لێدوانی فەمی: مەسعوود پزیشکیان، سەرۆککۆماری ئێران ڕایگەیاند:  توانای بەرگریکردنی  ئێران ئەوەندە گەشەی کردووە کە هیچ کەسێک ناتوانێت دەستدرێژی بەرامبەر بکات. 

 

کاریگەریی و لێکەوتەکان: لە چەند ڕۆژی ڕابردوودا گرژییەکان لە ڕۆژهەڵاتی ناوەڕاست توندتر بوونەتەوە، چونکە ئاراستەی هێزی ئاگرینی ئیسرائیل بەرەو باکوور بۆ سنووری لوبنان گۆڕاوە و ئێستا سوپای ئیسرائیل لە دژی چەکدارانی حیزبوڵڵا لەشەڕ دان.

 

لە لایەکی دیکەوە: ئێران لەلایەن وڵاتانی ڕۆژئاواوە، لەوانەش بەریتانیا، فەرەنسا، ئەڵمانیا و ئەمریکا تۆمەتبار دەکرێت بەوەی کە مووشەک و  فڕۆکەی بێفڕۆکەوانی بۆ ڕووسیا لە دژی ئۆکراینا دابین کردووە، ئێرانیش چەند جارێک ئەم تۆمەتانەی ڕەتکردۆتەوە.