هەناردەکردنی کاڵا و بەرهەمی کوردستان بۆ بازاڕەکانی عێراق ئاسایی بووەتەوە

ئاڤا نیوز

 

دوای کۆبووەنەوەی ئەنجوومەنی وەزاریی ئابووریی هەرێمی کوردستان و عێراق لە هەولێر، ڕێگریی لە بەرهەمی کۆمپانیا و کارگەکانی هەرێمی کوردستان لە بازگەکانی عێراق تا ئاستێکی زۆر نەماوە و بەشێوەیەکی ئاسایی هەناردەی بەرهەمەکان دەستیپێکردووەتەوە.

 

وێنە گەورەکە: لە ماوەی دوو مانگی ڕابردوودا دووجار بە بیانووی ئەوەی کۆمپانیاکانی هەرێمی کوردستان مۆڵەتیان لە عێراق نییە، ڕێگریی لە هاوردەی بەرهەمی کۆمپانیا پێشەسازییەکانی هەرێمی کوردستان بۆ پارێزگاکانی عێراق کرا، لە کۆبوونەوەی ئەنجوومەنی باڵای ئابووریی هەولێر و بەغدا لەسەر ئەوە ڕێککەوتن کە هەر کۆمپانیایەک مۆڵەتی لە هەرێمی کوردستان هەبێت، لە دەروازەکانی عێراق ڕێگە بە هاوردەی بەرهەمەکانی بدرێت.

 

لێدوانی فەرمی: گەیلان حاجی سەعید، سەرۆکی ژووری بازرگانی و پیشەسازیی هەولێر بە ئاڤا نیوزی ڕاگەیاند، "دوای کۆبوونەوەکان چەند ڕێگرییەکی کەم تۆماکراون، دەتوانین بڵێین تا ڕادەیەکی زۆر دۆخەکە ئاسایی بووەتەوە، هەرچەندە تاوەکو ئێستا بڕیارەکە نەگەیشتووەتە دەروازەکان بۆ هەڵگرتنی ڕێگرییەکان."

 

بابەتە ستراتیژییەکان: بازاڕەکانی عێراق ناوەندێکی گرنگن بۆ ساغکردنەوەی ئەو بەرهەمە جۆراوجۆرانەی لە کۆمپانیا و کارگەکانی هەرێمی کوردستان بەرهەم دەهێنرێن، 70%ـی بەرهەمەکان هەناردەی بازاڕەکانی ناوەڕاست و خوارووی عێراق دەکرێن.