لاهوور شێخ جەنگی: بە پلان و بەرنامەیەکی بەهێز خۆمان بۆ هەڵبژاردن ئامادەکردووە

ئاڤا نیوز

لاهوور شێخ جەنگی ڕایدەگەیێنێ، بە پلان و بەرنامەیەکی بەهێز خۆیان بۆ هەڵبژاردن ئامادەکردووە و وەک بەەی گەل دەیانەوێت گۆڕانکاریی راستەقینە بکەن لە حکومڕانی هەرێمی کوردستان.

 

وێنە گەورەکە: لەگەڵ نزیکبوونەوەی هەڵبژاردنی پەرلەمانی کوردستان، لاهور شێخ جەنگی، سەرۆکی بەرەی گەل دەستی بە سەردانکردنی شارەکان کردووە و چاوی لەوەیە لەڕێگەی هەڵبژاردنەوە بگەڕێتەوە گوڕەپانی سیاسی.

 

ئەوەی پێویستە بیزانیت: زۆربەی چوونە نێو خەڵک و سەردانەکانی لاهور شێخ جەنگی لە سنووری ئیدارەکانی ڕاپەڕین و گەرمیان و پارێزگاکانی سلێمانی و هەڵەبجەیە، بەپێی ڕاپرسییەکانیش پێشبینی دەکرێت ژمارەیەک کورسی لەو سنوورە بەدەستبێنێت.

 

لەلایەکی دیکەوە: ئەمڕۆ سێشەممە لاهوور شێخ جەنگی لەمیانی کۆبوونەوەی لەگەڵ جانێت ئەلبێردا، باڵیۆزی نوێی هۆڵەندا لە هەولێر ڕایگەیاند: "وەک بەرەی گەل بە پلان و بەرنامەیەکی بەهێزەوە خۆمان بۆ هەڵبژاردن ئامادەکردووە و دەمانەوێت گۆڕانکاریی ڕاستەقینە بکەین لە حکومڕانی هەرێمی کوردستان".

 

باکگراوند: هەشتی تەمموی 2022 لاهوور شێخ جەنگی وەک هاوسەرۆکی یەکێتی لەگەڵ چەندین سەرکردە و بەرپرسی دیکە لە ڕیزەکانی یەکێتیی نیشتمانیی کوردستان دەرکران، ئێستاش وەک بەشێکی جیابووەوە لە یەکێتی دەگەڕێتەوە نێو سیاسییەت و چەقی هێزەکەیشی لە سلێمانییەوە دەبێت.