دەستەی مافی مرۆڤ لەسەر هێرشکردنە سەر سەردار کەرکووکی هاتە دەنگ

ئاڤا نیوز

  

دەستەی سەربەخۆی مافی مرۆڤ سەبارەت بە لێدان و سوکایەتیکردن بە سەردار کەرکووکی لە لەلایەن گرووپێکی چەکدارەوە پەیامێک بڵاو دەکاتەوە.

 

وێنە گەورەکە: رۆژی 26ــی ئەیلوولی 2024،  سەردار کەرکووکی، هونەرمەندی میللی دانیشتووی شاری کۆیە،  بەگوتەی خۆی لەلایەن چەند چەکدارێکەوە بەئۆتومبێلی سەربازیی لە ماڵەکەی خۆی بردراوە و دواتر لێی دراوە و سوکایەتیەکی زۆری پێکراوە.

 

ڕاگەیێندراوی فەرمی: دەستەی سەربەخۆی مافی مرۆڤ ڕایگەیاند، وێڕای ئەوەی ئیدانەی ئەو کارە و مامەڵەی ئەو هێزە دەکەین، لە هەمانکاتدا پێویستە هەرچی زووە دەزگای ئاسایشی هەرێمی کوردستان لە کۆیە و پۆلیسی ئەو شارە ڕوونکردنەوە بدەن لەسەر ئەو ڕووداوە و ناسنامەی بکەرانی ئەو کارە نایاسایی و دوور لە ڕێکار و ئادابی گشتیە ئاشکرا بکەن.

 

لەلایەکی دیکەوە: دەستەی مافی مرۆڤ داوا دەکات، هەرچی زووە بکەرانی ئەو کردارە بدرێنە دادگا، داواکاری گشتیی کۆیە ڕۆڵی خۆی ببینێ بۆ جوڵاندنی سکاڵا لەپێناو پارێزگاریکردن لە مافی کەسی و گشتی،ناکرێت بەهیچ بیانوێک لە ژێر هیچ ناوێک، هیچ هێزێکی ئەمنی دوور لە یاسا و فەرمانی دادوەر بچنە سەر ماڵی هاووڵاتیان، هاوکات وەک دەستەکە لە نزیکەوە چاودێری ئەو کەیسە دەکەین، لەگەڵ لایەنی پەیوەندیدار لە کۆیە لەسەر خەت دەبین.

 

ئەمەش بزانە: سەردار کەرکووکی لەمیانی بەشداریکردنی لە گەشتی هەواڵەکانی ئاڤا نیوز ڕایگەیاند: لەلایەن چەند چەکدارێکی سەر بە  بەرپرسێکی یەکێتییەوە هێرشی کراوەتە سەر و ئەشکەنجە دراوە و ژیانی لە مەترسیدایە.