حیزبوڵڵا: تەرمی حەسەن نەسڕوڵڵا لە کەربەلا بە خاک ناسپێردرێت

ئاڤا نیوز

 

ڕاوێژکارێکی حکومەتی عێراق ڕایدەگەیێنێت تەرمی حەسەن نەسڕوڵڵا لە تەنیشت "باپیرەی ئیمام حوسێن" لە کەربەلا بەخاک دەسپێردرێت، بەڵام حیزبوڵڵا ڕەتیدەکاتەوە لە عێراق بە خاک بسپێردرێت.

 

وێنە گەورەکە: دواى دوو ڕۆژ لە کوژرانى، یەکشەممە 29-9-2024 تەرمى حەسەن نەسڕوڵڵا، ئەمینداری گشتیی حیزبوڵڵا لەژێر دار و پەردووى ڕووخاوى ئەو باڵەخانەیە دەرهێنرا کە ئیسرائیل لە ناوچەی باشووری لوبنان تێیدا کردیە ئامانج.

 

بڵاوکراوەی فەرمی: عەبدولئەمیر تعێبان، ڕاوێژکاری سەرۆکوەزیرانی عێراق، لە پۆستێکیدا لە تۆڕی "X" ڕایگەیاند: "تەرمی شەهید حەسەن نەسڕوڵڵا لە تەنیشت باپیرەی ئیمام حوسێن لە کەربەلای پیرۆز بەخاک دەسپێردرێت".

 

لەلایەکی دیکە: سەرچاوەیەک لە حیزبوڵڵا لە لێدوانێکدا بە ئاڤا نیوزی ڕاگەیاند "هەواڵی ناشتنی تەرمی حەسەن نەسڕوڵڵا لە کەربەلا لە نزیک مەزارگەی ئیمام حوسێن ڕاست نییە" و جەختی لەوە کردەوە "تا ئێستا هیچ شتێک لەبارەی ناشتن و ڕێوەڕەسمی دیاری نەکراوە".

 

ئەوەی پێویستە بیزانیت: ڕۆژی شەممە 28-9-2024، سوپای ئیسرائیل کوژرانی حەسەن نەسروڵڵای لە هێرشێکدا بۆ سەر باڵەخانەیەک لە بەیرووت ڕاگەیاند، دوای چەند کاتژمێرێکیش حیزبوڵڵا کوژرانی سەرکردەکەیانی پشتڕاست کردەوە.

 

ئەمەش بزانە: ئاژانسى هەواڵى ڕۆیتەرز لە زارى چەند سەرچاوەیەکەوە ڕایگەیاند: جەستەی حەسەن نەسڕوڵڵا هیچ برینێکی پێوە نەبووە، وادیارە هۆکاری مردنەکەی بەهۆی شۆکەوە بووە لە ئەنجامی بەرزیی دەنگی ئەو بۆمبەی ئاراستەی شوێنەکە کراوە.