ئاسایشی هەولێر لەبارەی ڕووداوەکەی مزگەوتی ڕەشاد موفتی ڕوونکردنەوە دەدات

ئاڤا نیوز 

 
ئاسایشی هەولێر وردەکاریی ڕووداوەکەی مزگەوتی ڕەشاد موفتی بڵاودەکاتەوە کە بووە هۆی برینداربوونی سێ کەس و هۆکارەکەی بۆ کێشەیەکی کۆمەڵایەتی سەردەمی شەڕی ناوخۆ دەگەڕێنێتەوە.

چیرۆکی سەرەکی: دوانیوەڕۆی ئەمڕۆ دووشەممە شاڵاو کۆسرەت ڕەسوڵ، سەرۆکی لیستی یەکێتیی نیشتمانیی کوردستان لە بازنەی هەولێر، لەکاتی بەشداریکردن لە پرسەی کۆچکردووێک بە ناوی (توفیق حەمەدئەمین مەنتک) لە مزگەوتی ڕەشاد موفتی، دەمەقاڵێ و شەڕ لەنێوان پاسەوانانی شاڵاو کۆسرەت و کەسوکاری تۆفیق حەمەد دروست دەبێت، تەقەکردنی تێدەکەوێت و بەهۆیەوە کەسێک بریندار دەبێت، گوللە بەر ڕانی کەوتووە و بەشداربووی پرسەکە بووە.

 

ڕاگەیێنراوی فەرمی: بەگوێرەی ڕاگەیێنراوی فەرمی ئاسایشی هەولێر، بنەماڵەی خاوەن پرسەکان بە شاڵاو کۆسرەتیان گوتووە پرسەکە جێبهڵێت و ڕەزامەند نەبوون لە سەردانەکەی، چونکە لە ڕابردوو دوو کەسی خاوەن پرسەکە بەدەستی بنەماڵەی ئەو شەهید کراون، بەم هۆیەوە دەبێتە دەمەقاڵێیان و پاسەوانەکانی شاڵاو بە بێ گوێدانە هیچ ڕێزێک بۆ حەرەمی مزگەوت، هێرشیان کردووەتە سەر خاوەنی پرسەکە و تەقەیەکی زۆریان کردووە، هاووڵاتییەک بە گوللـەی پاسەوانەکانی شاڵاو بریندار  کراوە."

لێدوانی فەرمی: بارزان قەساب، بەڕێوەبەری ئاسایشی هەولێر لە کۆنگرەیەکی ڕۆژنامەوانیدا گوتی، "هۆکاری ڕووداوەکە بۆ کێشەیەکی کۆمەڵایەتی سەردەمی شەڕی ناوخۆ دەگەڕێتەوە، یەک کەس بریندارە و لە نەخۆشخانەی ئیمێرجێنسییە."

لەلایەکی دیکەوە: کارزان ساڵح، گوتەبێژی پۆلیسی هەولێر بە ئاڤا نیوزی ڕاگەیاند، "لێکۆڵینەوە لە ڕووداوەکە دەستیپێکردووە و تۆمەتباران دەستگیر دەکرێن."