گۆهدار شێخۆ: لەماوەی سێ ساڵدا هەشت هەزار هەلی کار ڕەخسێنراون

ئاڤا نیوز

 

سێ ساڵە زاخۆ ئیدارەی سەربەخۆییە، کار لەسەر بووژاندنەوەی کەرتە جیاوازەکان بەگشتیی و گەشتیاریی بە تایبەت کراوە، لەو ماوەیەدا لەڕێگەی ژمارەیەک پڕۆژەی جیاوازەوە هەزاران هێزی کار خراونەتە سەرکار.

 

وێنە گەورەکە: لە ماوەیەی سێ ساڵدا 220 پڕۆژە لە سنووری ئیدارەی زاخۆ جێبەجێکراون و 70 پڕۆژەی دیکەیش لەژێر جێبەجێکردندان، ئەو ئیدارەیە 30 پڕۆژەی گەشتیاریی لەخۆدەگرێت، لەو ڕێگەیەوە هەلی کار بۆ گەنجانی سنوورەکە ڕەخسێنراون.

 

لێدوانی فەرمی: گۆهدار شێخۆ، سەرپەرشتیاریی ئیدارەی سەربەخۆی زاخۆ لە بەرنامەی نان و چای ئاڤا بەشداریکرد و گوتی، "لەماوەی سێ ساڵدا هەشت هەزار هەلی کار ڕەخسێنراون، هاوکات لە ماوەی یەک هەفتەدا 38 خولی جۆراوجۆر بۆ ڕاهێنانی گەنجان لەسەر کولتووری پێشوازیکردن لە گەشتیاران کراون."

 

ئەوەی پێویستە بیزانیت: لەڕووی گەشتیارییەوە زاخۆ پێشکەوتنی گەورە بەخۆیەوە بینیوە، بەشێوەیەک ڕێژەی گەشتیار و سەردانیکاری ساڵانە لە 60 هەزار گەشتیارەوە بۆ 100 هەزار گەشتیار بەرزبووەتەوە.

 

خاڵی ستراتیژی: زاخۆ ناوچەکی ستراتیژییە و دەکەوێتە سنووری نێوان عێراق و تورکیا، ئەمەش کارئاسانیی دەکات بۆ ئەوەی هەزاران گەشتیاری بیانیی ڕوو لەو ناوچەیە بکەن.