یەکەم شوێن پرۆسەی دابەشکردنی زەوی لە زاخۆ دەستپێدەکات

ئاڤا نیوز

لە چەند ڕۆژی داهاتوودا دەست بە دابەشکردنی زەوی بەسەر فەرمانبەران و خانەنشینان دەکرێت، ئاڤا نیوز زانیویەتی یەکەم شوێن کە پرۆسەکەی لێ دەستپێدەکات ئیدارەی سەربەخۆی زاخۆیە.

 

وێنە گەورەکە: وەزارەتی شارەوانی ئەمڕۆ دووشەممە ڕایگەیاند، ئامادەكارییەكانی دابەشكردنی زەوی بەسەر فەرمانبەران خێراتر كراون، لە چەند ڕۆژی داهاتوودا لەو شارەوانییانەی كارە هونەری و كارگێڕییەكان تەواوكراون پرۆسەکە دەستپێدەكات.

 

ئەوەی پێویستە بیزانیت: لە وەزارەتی شارەوانی فۆڕمی فەرمانبەر و خانەنشینانی سنووری ئیدارەی سەربەخۆی زاخۆ جیاکراوەتەوە و لەم ڕۆژانە بۆ شارەوانی ئیدارەکە دەنێردرێنەوە، بە دیاریکراوی لە ڕۆژانی 13 یان  14ی ئەم مانگە دەست بە پرۆسەی دابەشكردنی زەوی دەکرێت.

لێدوانی فەرمی: سەربەست مەولوود،  بەڕێوەبەری گشتیی کاروباری یاسایی لە وەزارەتی شارەوانی و گەشتوگوزار بە ئاڤا نیوزی گوت: "زیاتر لە  پێنج هەزار پارچە زەوی تاپۆ لە زاخۆ ئامادەن، بەسەر ئەو فەرمانبەر و خانەشنیانە دابەش دەکرێن کە پێشووتر زەوییان بۆ دەرچووە و بە هۆکاری جیاواز وەریان نەگرتووە."

لەلایەکی دیکەوە: وەزارەتی شارەوانی کار لەسەر ئەوە دەکات لەگەڵ زاخۆ پرۆسەکە لە هەولێر و دهۆکیش دەستپێبکات، ئەگەر تاوەکو ئەو کاتە زەوییەکان ئامادە بوون.