وڵاتانی ئەندام لە بریکس دەیانەوێت مامەڵەیەكی دوور لە دۆلار بكەن

ئاڤا نیوز

وڵاتانی ئەندام لە بریکس کە  44%ـی یەدەگی نەوتی جیهان  و 32%ی كۆی گشتی بەرهەمی جیهان پێكدەهێنێن، دەیانەوێت چیتر دۆلار لە مامەڵەکانیان بەکارنەهێنن.

وێنە گەورەکە: بریكس، ڕێكخراوێكی ئابوورییە و هەریەكە لە ڕووسیا، چین، هندستان و ئەفریقای باشوور تێیدا ئەندامن و لە ڕووسیا کۆبوونەوە. هەر ئەمانە نین، هەریەكە لە میسر، ئەسیوپیا، سعوودیە و ئیماڕات ئەندامی نوێی ڕێکخراوەکەن و  30 وڵاتی دیكەش دەیانەوێت ببنە ئەندام كە دیارترینیان پاكستا و ڤەنزوێلان.

لێدوانە فەرمییەکان: سەرۆکی سێ وڵاتی گەورە و زلهێزی جیهان، ڕووسیا، چین و هیندستان لە کۆبوونەوەکەدا بەشدار بوون و وتەیان پێشکەش کرد:

ڤلادیمێر پووتین، سەرۆکی ڕووسیا: "هاوکاری نێوان پەکین و مۆسکۆ  لەسەر بنەمای یەکسانی و قازانجی هاوبەشە و بەتەواوی بۆ هەموو لایەکە، کەشێکی ئەرێنی هەیە لە هاوکارییە ئابوورییەکانی نێوان هەردوو وڵات".

شی جین بینگ، سەرۆكی چین: "جیهان گۆڕانکاری قووڵی بەسەردا دێت کە لە ماوەی سەدەیەکدا نەبینراوە، بارودۆخی نێودەوڵەتیش خەریکە پشێووی تێدەکەوێت، بەڵام من باوەڕێکی پتەوم هەیە کە دۆستایەتی قووڵی چین و ڕووسیا نەوە بۆ نەوە ناگۆڕێت". 

نارێندرا مودی، سەرۆکوەزیرانی هیندستان: "ئێمە بەردەوام لە پەیوەندیدا بووین لەسەر ململانێی نێوان ڕووسیا و ئۆکرانیا. ئێمە پێمانوایە ناکۆکییەکان تەنها بە ئاشتیانە چارەسەر دەکرێن".

زانیاریی زیاتر: لە ساڵی 2015ەوە ئەم وڵاتانە بانکی گەشەپێدانیان دامەزراندووە و ئەم بانکە توانای دابینکردنی زیاتر لە 32 ملیار دۆلاری هەیە بۆ پرۆژەکانی ئاو، ڕێگاوبان و ژێرخان.

ئەمانەش بزانە: وڵاتانی ئەندام لە ڕێكخراوی بریكس:

- ٪45ـی ژمارەی دانیشتووانی جیهان پێكدەهێنێن.

- ٪32ـی كۆی گشتی بەرهەمی جیهان پێكدەهێنێن.

- ٪44ـی یەدەگی نەوتی جیهان پێكدەهێنێن.

- خاوەنی سێیەكی یەدەگی گازی سرووشتی جیهانن.