کۆمیسیۆن زۆری ژمارەی دەنگی پووچەڵ بۆ سێ هۆکار دەگەڕێنێتەوە

ئاڤا نیوز

کۆمیسیۆنی هەڵبژاردنەکانی عێراق هۆکاری زیادبوونی دەنگی پووچەڵ لە هەڵبژاردنی پەرلەمانی کوردستان ئاشکرا دەکات کە بووەتەوە جێی نیگەرانیی هەندێک لایەن و بەربژێر، ئامادەییش نیشان دەدات تەواوی زانیارییەکان پێشکەش بە لیست و بەربژێرەکان بکات.

 
وێنە گەورەکە: لە هەڵبژاردنی خولی شەشەمی پەرلەمانی کوردستان دوو ملیۆن و 87 هەزار و 972 کەس بەشداریی دەنگدانیان کرد، لەو ژمارەیە  209 هەزار و 200 دەنگ پووچەڵ بوون.

ڕاگەیێنراوی فەرمی: جومانە غەلای، گوتەبێژی کۆمیسیۆنی باڵای سەربەخۆی هەڵبژاردنەکانی عێراق ڕایگەیاند: "کۆمیسیۆن لە چەند ڕۆژی داهاتوودا داوا لە بەربژێران دەکات سەردانی لقەکانی کۆمیسیۆن بکەن لە پارێزگاکانیان، میمۆرییەکی SSD4T یان پێدەدرێت کە ڕاپۆرتی ئەنجامەکانیان و وێنەی فۆرمی ئەو دەنگانە لەخۆدەکرێت کە بەدەستیان هێناوە".

هۆکارە زانراوەکان: کۆمیسیۆن ئاماژەی بە سێ هۆکار کردووە، بەشێک لە دەنگدەران مۆری دەنگدانیان تەنیا لە ژمارەی بەربژێران داوە بێ ئەوەی مۆر لە لیستەکەی بدەن، بەشێک لە فۆرمەکانی دەنگدان بە بەتاڵی خراونەتە سندووقەکان، بەشێکیش لە دەنگدەران دەنگیان بە بەربژێرێکی سەربەخۆ و بە لیستێک داوە. 

ئەوەی پێویستە بیزانیت: سەبارەت بە سکاڵاکان کە 189 سکاڵا تۆمارکراون، جومانە غەلای دەڵێت هێشتا لە قۆناغی پۆلێنکردن دایە و لە ڕۆژانی داهاتوودا بڕیاریان لەبارەوە دەدرێت.