ئاماری سەرەتایی کوژراو بریندارانی هێرشەکەی تورکیا ڕاگەیێنرا

ئاڤا نیوز

 

بە تەقینەوە و دەستڕێژیی گوللە هێرش کراوەتە سەر کۆمپانیای پیشەسازیی فڕۆکەوانی تورکیا  و کوژراو و بریندار هەیە.

ئەوەی لەبارەیەوە دەگوترێت: میدیاکانی تورکیا لەبارەی هێرشەکەوە دەڵێن، دەنگی تەقینەوەیەکی بەهێز لە شوێنەکە بیستراوە، هاوکات ڤیدیۆی هێرشی چەکداری و پێکدادان لە شوێنی ڕووداوەکە بڵاوکراوەتەوە، وەک لە ڤیدیۆکانیش دەردەکەوێت یەکێک لە چەکدارەکان ژن بووە.

زانیاریی بەدەستهاتوو: بەگوێرەی زانیارییەکان لە هێرشەکەدا چوار کەس کوژران و چواردە کەسی دیکەش بریندار بوون.

 
ڕاگەیێنراوی فەرمی: عەلی یەرلیکایا، وەزیری ناوخۆی تورکیا لە تۆڕی کۆمەڵایەتی ئێکس هێرشەکەی بە تیرۆریستی داناوە و ڕایگەیاندووە: "هێرشەکە کراوەتە سەر دامەزراوەکانی پیشەسازیی فڕۆکەوانی لە ناوچەی هرەمانکازان لە ئەنقەرە، بەداخەوە شەهید و بریندرارمان هەیە".

 

بۆچی گرنگە: کۆمپانیای فڕۆکەوانی تورکیا  کە بە 'توساش' ناسراوە، یەکێکە لە گرنگترین کۆمپانیاکانی بواری فڕۆکەوانی لە تورکیا و یەکەمین فڕۆکەی شەڕکەری تورکیای دروست کردووە بە ناوی "کان".

 

لەلایەکی دیکەوە: مارک ڕووتێ، سکرتیری هاوپەیمانی ناتۆ لە ڕێگەی پەیوەندییەکی تەلەفۆنییەوە لەگەڵ ڕەجەب تەیب ئەردۆغان، سەرۆککۆماری تورکیا پشتیووانی هاوپەیمانێتییەکەی بۆ تورکیا دووپاتکردەوە.