سەرۆکێکی نوێ بۆ دەستەی دەستپاکیی عێراق دادەنرێت

ئاڤا نیوز 

 

محەممەد عەلی لامی، وەک سەرۆکی دەستەی دەستپاکیی فیدراڵیی عێراق دەستبەکاربوو، دوای دوورخستنەوەی حەیدەر حەنوون، سەرۆکی پێشووی دەستەکە. 

 

وێنە گەورەکە: دوای ئەوەی حەیدەر حەنوون لە پۆستی سەرۆکی دەستەی دەستپاکی دوورخرایەوە و لەلایەن سەرۆکوەزیرانی عێراقەوە کەسێکی دیکە بە ناوی محەممەد عەلی لامی وەک سەرۆکی دەستەکە دەستنیشان کرا، دوای دوورخستنەوەشی بە پلەی ڕاوێژکاری تایبەت لە وەزارەتی داد دامەزرێنرا.

 
ڕاگەیێنراوی فەرمی: دەستەی دەستپاکیی فیدراڵیی عێراق، ڕۆژی پێنجشەممە 24-10-2024 ڕایگەیاند کە محەممەد عەلی لامی، وەک سەرۆکی دەستەکە دەستبەکاربوو.

 

ئەوەی لەبارەیەوە دەگوترێت: ئاڤا نیوز لە سەرچاوەیەکی حکومی زانیویەتی، دوورخستنەوەی حەیدەر حەنوون و بوونی بە ڕاوێژکاری پلە تایبەت بە ڕێکەوتن و نێوەندگیری چەند لایەنێکی سیاسی کراوە بە مەرجێک لێکۆڵینەوە لە تۆمارە دەنگییەکەی حەنوون کۆتایی پێ بێت و هەموو ئەو تۆمەتانەی دژی هەڵبووەشێنێنەوە.

 

ئەوەی پێویستە بیزانیت: محەممەد لامی لە ساڵی 1975 لە دایکبووە و بڕوانامەی دکتۆرای لە یاسا بەدەستهێناوە و کۆنترین بەڕێوەبەری گشتییە لە دەستەی دەستپاکی و بەڕێوەبەری چەندین بەڕێوەبەرایەتی بووە لە دەستەکەدا، دوایین جار بەڕێوەبەری گشتیی بەڕێوەبەرایەتیی خۆپارێزی بووە.