ئەکسیۆس: ئیسرائیل ڕۆژێک پێشتر ئێرانی لە هێرشەکە ئاگادار کردووەتەوە

ئاڤا نیوز

 

بەگوێرەی ئاژانسی ئەکسیۆسی ئەمریکی دەسەڵاتدارانی ئیسرائیل ڕۆژێک پێش هێرشەکەی بەرەبەیانی ئەمڕۆ شەممە، ئێرانی لە کاتی ئەنجامدانی هێرشەکە ئاگادارکردبووەوە.

 

وێنە گەورەکە: بەرەبەیانی ئەمڕۆ شەممە 2024/10/26 ئیسرائیل بە دوو قۆناغ هێرشی ئاسمانی کردە سەر چەند بنکەیەکی سەربازیی ئێران لە پارێزگاکانی تاران و ئیلام و خۆزستان، وەک وەڵامێک بۆ هێرشە مووشەکییەکەی تاران بۆ سەر ئیسرائیل لە مانگی ڕابردوودا. 

 

زانیاریی بەدەستهاتوو: ئاژانسی ئەکسیۆسی ئەمریکی لە ڕاپۆرتێکدا ئاماژە بەوە دەدات، ڕۆژی هەینی، 25-10-2024، واتە ڕۆژێک بەرلەوەی هێرش بکاتە سەر ئێران، ئیسرائیل لە ڕێگەی چەند لایەنێکەوە، لەوانە لە ڕێگەی وەزیری دەرەوەی هۆلەندا، پەیامی بۆ ئێران ناردووە و پێی ڕاگەیاندووە، هێرش ئەنجام دەدات و هۆشداریشی داوە لەوەی کە نابێت ئێران وەڵام بداتەوە، ئەگەر ئێران وەڵام بداتەوە ئەوا جارێکی دیکە ئیسرائیل هێرش دەکات و تۆڵە دەسێنێتەوە، بە تایبەت ئەگەر کەسانی سڤیلی ئیسرائیلی لە هێرشەکەی ئێراندا بکوژرێن یان بریندار ببن. 

 

زانیاریی زیاتر: ئیسرائیل لە پەیامەکەیدا پێشوەختە بە ئێرانییەکانی گوتووە هێرشەکانی کوێ بە ئامانج دەگرن و کوێش لە هێرشەکان پارێزراو دەبن.

 

ڕێکەوتنەکە بەم شێوەیەیە: بە گوێرەی ئاژانسەکە، کە زانیارییەکانی لە چەند سەرچاوەی ئاگادارەوە وەرگرتووە، مەبەستی ئیسرائیل لە ناردنی ئەم پەیامە بۆ ئێران ئەوە بووە کە ویستوویەتی هێرشەکانی نێوان هەردوولا کۆتاییان پێ بێت و چیدی هێرش نەکەنە سەر یەکدی و بەم شێوەیەش ڕێگە لە فراوانبوونی شەڕەکە بگرن.

گۆشەیەکی دیکەی دیمەنەکە: هێرشەکانی ئیسرائیل سیستەمی بەرگریی ئاسمانیی ئێران و پێگەکانی درووستکردنی مووشەک و درۆنی ئێرانیان بە ئامانج گرت.

 

ئەوەی لەبارەیەوە دەگوترێت: هاوکات سەرچاوەیەکی ئەمریکی ئاشکرای کردووە، ئەمریکا لە هێرشەکەی ئیسرائیل بۆ سەر ئێران بەشدار نەبووە، بەڵام ئەگەر ئێران وەڵامی ئیسرائیل بداتەوە، ئەوا ئامادەیە بەرگریی لە ئیسرائیل بکات. 

 

بۆچوونی لایەنی بەرامبەر: ئێران ڕایگەیاند، توانیویەتی بەرپەرچی هێرشەکەی ئیسرائیل بداتەوە و تەنیا زیانێکی سنووردار بەر چەند ئامانجێکی سەربازیی ئەو وڵاتە کەوتووە.