پەرلەمانی عێراق بۆ هەڵبژاردنی سەرۆکێکی نوێ کۆدەبێتەوە

ئاڤا نیوز


پەرلەمانی عێراق بۆ هەڵبژاردنی سەرۆکێکی نوێ بە ئامادەبوونی زیاتر لە 270 پەرلەمانتار کۆبووەوە و لە گەڕی یەکەم هیچ کاندیدێک دەنگی پێویستی نەهێنا.

 

وێنە گەورەکە: ئەم دانیشتنەی پەرلەمانی عێراق بۆ هەڵبژاردنی سەرۆکێکی نوێ، دوای نزیکەی ساڵێک لە دوورخستنەوەی محەممەد حەلبووسی دێت.

چیرۆکی سەرەکی: چوار کاندید کێبڕکێیان لەسەر پۆستەکە دەکرد: سالم عیساوی، مەحموود مەشهەدانی، تەڵاڵ زەوبەعی و عامر عەبدولجەبار. لە گەڕی یەکەم هەر یەکێک لە کاندیدەکان پێویستی بە  166 دەنگ بوو بۆ ئەوەی ببێتە سەرۆکی پەرلەمان، بەڵام هیچ کاندیدێک دەنگی پێویستی نەهێنا، بۆیە دەنگدان کەوتە گەڕی دووەم.

لە پەیامنێرەوە؛ دەرون مەلا ناجی، پەیامنێری ئاڤا لە پەرلەمانی عێراق ڕایگەیاند، 271 پەرلەمانتار بەشداریی دەنگدانیان کرد و ئەنجامەکە بەمشێوەیە بوو:

مەحموود مەشهەدانی: 153 دەنگ

سالم عیساوی: 95 دەنگ

 عامر عەبدولجەبار: 9 دەنگ

دەنگی پووچەڵ: 14 دەنگ

تەڵاڵ زەوبەعی: سفر دەنگ

لێدوانی فەرمی: پێش دەستپێکردنی دانیشتنەکە لە کۆنگرەیەکی ڕۆژنامەوانیدا مەحموود مەشهەدانی، کاندیدی سەرۆکی پەرلەمان ڕایگەیاند: من کاندیدی زۆرینەی سوننەم و بە کۆدەنگی هەموو لایەنەکان، زۆرینەی سوننە منی کاندید کردووە، بۆیە داوا لە لایەنە نیشتمانییەکان دەکەم پشتیوانی لەو کاندیدکردنە بکەن کە هی زۆرینەی سوننەکانە، پشتیوان بە خودا ئەمڕۆ ئەو پرسە کۆتایی پێدەهێنرێت کە دەمێکە چاوەڕوان دەکرێت.

لەلایەکی دیکەوە: سەبارەت بە هەڵوێستی فراکسیۆنە کوردستانییەکان، مەشهەدانی ڕایگەیاند: هەڵوێستی فراکسیۆنە کوردستانییەکان بە پارتی دیموکراتی کوردستانیشەوە باشە و جێگەی سوپاسە.