لە هەولێر سەنتەرێک بۆ چاندنی ئەندامەکانی جەستە دەکرێتەوە

ئاڤا نیوز

 

سەنتەرێکی نیشتمانی بۆ چاندنەوەی ئەندامەکانی جەستە لە هەولێر دەکرێتەوە، وەزیری تەندروستی لەوبارەیەوە دەڵێت: "باڵەخانەی سەنتەرەکە لە قۆناغی دروستکردن دایە".

 

وێنە گەورەکە: لە چوارچێوەی هەوڵەکانی بۆ پێشخستنی کەرتی تەندروستی، حکومەتی هەرێمی کوردستان کار بۆ دروستکردنی سەنتەرێکی تایبەت بە چاندنەوەی ئەندامەکانی جەستە دەکات.

 

لێدوانی فەرمی: د.سامان بەرزنجی، وەزیری تەندروستی حکومەتی هەرێمی کوردستان، بە ئاڤا نیوزی ڕاگەیاند: سەنتەری نیشتمانی بۆ چاندنەوەی ئەندامەکانی جەستە لەنێو نەخۆشخانەی ڕزگاری دەکەینەوە، ئێستا باڵەخانەکەی لە قۆناغی دروستکردن دایە.

 

وەزیری تەندروستی دەڵێت: "لە سەنتەرەکە بە دیاریکراوی جگەر و گورچیلە دەچێنرێنەوە".

 

زانیاریی زیاتر: بە گوتەی د.سامان بەرزنجی، ئێستا هەولێر لەسەر ئاستی هەرێمی کوردستان و عێراق بۆ چاندنەوەی جگەر و گورچیلە لە پلەی یەکەمدایە.

 

ئەوەی پێویستە بیزانیت: ڕۆژی 7-11-2024، وەزیری تەندروستی لەگەڵ ستافێکی پسپۆڕی تایبەت بە چاندنەوەی ئەندامەکانی جەستە لە هەولێر کۆدەبێتەوە، ئامانج لە کۆبوونەوەکەش تاوتوێکردنی چۆنیەتی کردنەوەی سەنتەرەکە دەبێت.

خاڵە ئەرێنییەکان: کردنەوەی ئەم سەنتەرە کاریگەریی سەبارەت بە داهاتی ناوخۆ دەبێت و ڕێگا دوورەکانیش بۆ نەخۆشەکان کورت دەکاتەوە و ناچار نابن بۆ چاندنەوەی ئەندامەکانی جەستە ڕوو لە دەرەوەی وڵات بکەن.