لە هەفتەیەکدا کۆڵبەرێک دەکوژرێت و شەشیش بریندار دەبن

ئاڤا نیوز

 

تەنها لە ماوەی هەفتەیەكدا، حەوت كۆڵبەری كورد لە ناوچە سنوورییەكانی نێوان باشووری کوردستان و ڕۆژهەڵاتی کوردستان، بە تەقەی ڕاستەوخۆی سوپای پاسداران، كوژراون و برینداركراون.

 

وێنە گەورەكە: بەشێك لە هاووڵاتییانی ڕۆژهەڵاتی كوردستان بۆ دابینكردنی بژێوی ژیانی خۆیان و خانەوادەكانیان، پەنا بۆ كاری كۆڵبەری دەبەن، سەرەڕای سەختی كارەكە و بڕینی هەوراز و نشێوی ناوچە شاخاوییەكان، بە بەردەوام لەلایەن هێزە چەكدارەكانی ئێرانەوە بە بیانووی نایاسایی كارەكانیان و پاراستنی ئەمنییەتی سنوور، بە ئامانج دەگیرێن، ساڵانە دەیان كوڵبەر دەكوژرێن و بریندار دەكرێن.

 

ڕاگەیێنراوی فەرمی: ڕێكخراوی مافی مرۆڤی هەنگاو، كە گرنگی بە پرسەكانی مافی مرۆڤ دەدات لە ئێران، ئاشكرایكردووە، تەنها لە ماوەی هەفتەیەكدا، كۆڵبەرێكی كوردی خەڵكی پیرانشار، دوای برینداركردنی لەلایەن چەكدارانی سوپای ئێران و دواتر ئەشكەنجەدانی، لەژێر ئازاردا گیانی لەدەست داوە. هەروەها شەش هاووڵاتیی دیكە، كە خەڵكی ناوچەكانی ڕۆژهەڵاتی كوردستانن، بە تەقەی ڕاستەوخۆی سوپای پاسدارانی ئێران، بە سەختی برینداركراون.

زانیاریی زیاتر: بەگوێرەی ڕاگەیێنراوەكەی ڕێكخراوی هەنگاو، برینداربووان خەڵكی شارەكانی: جوانڕۆ، سەردەشت، پاوە، ئورمیە و كرماشانن، كە پێنجیان بە تەقەی ڕاستەوخۆی هێزە چەكدارەكانی ئێران، بریندار كراون و كۆڵبەرێكیش لەترسی گولـلە، لە شاخ هەڵدێراوە و سەرجەمیان بەمەبەستی چارەسەری پزیشكی گواستراونەتەوە نەخۆشخانەكان.

ئەوەی پێویستە بیزانیت: ئەو كۆڵبەرەی گیانی لەدەستداوە، خەڵكی شاری پیرانشارە بە ناوی (حوسێن کەماڵنیا)، كە دوای برینداركردنی، لەلایەن هێزە چەکدارەکانی ئێرانەوە ئەشكەنجە دەدرێت، بەهۆیەوە گیانی لەدەست داوە.