حکومەتی عێراق تۆمارە دەنگییەکەی کەریم فەیسەڵ بەفەرمی ڕەتناکاتەوە

ئاڤا نیوز

دوای بڵاوبوونەوەی تۆمارە دەنگییەکەی کەریم فەیسەڵ، سەرۆکی دەستەی ڕاوێژکارانی ئەنجوومەنی وەزیرانی عێراق کە مامەڵەی وەرگرتنی بەرتیل لەگەڵ کەسێک دەکات و دواتر هەواڵی دوورخستنەوەی لە میدیاکان بڵاوبووەوە، نووسینگەی ڕاگەیاندنی سوودانی ڕاگەیێنراوێکی بڵاوکردەوە، بەڵام ڕاستەوخۆ ڕەتی ناکاتەوە.

وێنە گەورەکە:  لە تۆڕە کۆمەڵایەتییەکان تۆمارێکی دەنگی کەریم فەیسەڵ بڵاوبووەتەوە، داوای بەرتیل لە کەسێک بە ناوی ئەبو تەها دەکات و بە ملیۆنێک دۆلاریش ڕازی نابێت، ئەمەش لە ماوەیەکی کەمدا کاردانەوەیەکی زۆری لە میدیاکان و تۆڕە کۆمەڵایەتییەکان بەدوای خۆیدا هێنا.

ڕاگەیێنراوی فەرمی: نووسینگەی ڕاگەیاندنی محەممەد شیاع سوودانی، سەرۆکوەزیرانی عێراق باسی تۆمارکردنی سکاڵا لەسەر ئەو دەزگا میدیایانە دەکات کە هەواڵی درۆ و چەواشەکارانە و بێبنەما بڵاودەکەنەوە، دەڵێت حکومەت ڕووبەڕووی هێرشی میدیایی جۆراوجۆر بووەتەوە، بەڵام ڕاگەیێنراوەکەدا بەهیچ جۆرێک باسی تۆمارە دەنگییەکە نەکراوە و ناوی کەریم فەیسەڵ نەهێنراوە.

هاوکات جەخت لە ڕووبەڕووبوونەوەی گەندەڵیش دەکاتەوە و دەڵێت، بەردەوام دەبن و ئەو دەستکەوتانەی لە ڕووبەڕووبوونەوەی گەندەڵی بەدەسهاتوون گەندەڵکارانی تووڕە کردووە. 

لەلایەکی دیکەوە: کەریم فەیسەڵ ڕایگەیاند: "ئەو تۆمار دەنگییەی بە ناوی منەوە بڵاوبووەتەوە دوورە لە ڕاستی و بەتەواوی ڕەتی دەکەمەوە، سەرۆکوەزیرانیش بڕیاری دوورخستنەوەمی نەداوە، بڵاوکردنەوەی ئەم ساختەکارییە بەهۆی دەستپاکی و ڕێگریکردنمانە لە گەندەڵکاری و  متمانەم بە دەسەڵاتی دادوەری هەیە لە هێنانەدی دادپەروەری لەم ستەمەی لێم کراوە".

لێدوانە فەرمییەکان: ئەمڕۆ هەینی سەرچاوەیەک لە حکومەتی عێراق بۆ ئاڤا نیوز پشتڕاستی کردەوە کە کەریم فەیسەڵ لە پۆستەکەی دوورخراوەتەوە، بەڵام دواتر ئیبراهیم سومەیدەعی، ڕاوێژکاری سوودانی بە ئاڤا نیوزی گوت: "هەواڵی دوورخستنەوەی کەریم فەیسەڵ ڕاست نییە، بڕیاری لەمشێوەیە نەدراوە و ئەوەی بڵاوکراوەتەوە دوورە لە ڕاستییەوە".

ئەوەی لەبارەیەوە دەوترێت: بەشێک لە خەڵک و چاودێران لە تۆڕە کۆمەڵایەتییەکان دەڵێن تۆمارە دەنگییەکە بە ژیریی دەستکرد (AI) دروست کراوە، تاوەکو ئێستاش حکومەتی عێراق بە پشتڕاستکردنەوە یان ڕەتکردنەوە هیچی بەفەرمی لەسەر نەوتووە.