بەقاچاخبردنی دۆلار بۆ دەرەوەی عێراق لە ڕێگەی کڕینی ئەندۆمی ئاشکرا دەبێت

ئاڤا نیوز

 

عێراق ساڵی ڕابردوو 64 هەزار تۆن ئەندۆمی بە بڕی زیاتر لە 17 ملیۆن دۆلار هاوردە کردووە. نەبیل مەرسوومی، شارەزای ئابووری دەڵێت، ئەمریکا گومانی هەیە لەو ڕێگەیەوە دۆلار ببرێتە دەرەوەی عێراق.

 

لێدوانیی فەرمی: نەبیل مەرسوومی، شارەزای ئابووری: "بەپێی داتاکانی دەستەی گشتیی گومرگەکان بۆ ساڵی 2023، عێراق لە دەروازە سنوورییەکان جگە لە هەرێمی کوردستان 64.185 هەزار تۆن ئەندۆمی بە بڕی 17.7 ملیۆن دۆلار هاوردە کردووە کە دەکاتە 23.6 ملیار دینار، ئەو ژمارەیەش 18٪ بە بەراورد بە ساڵی 2022 زیادی کردووە".

 

ئەوەی پێشبینی دەکرێت: "ئەگەری هەیە ژمارەکە بۆ زیاتر بەرزبێتەوە و بگاتە  50 ملیۆن دۆلار ، چونکە دوو لەسەر سێی هاوردەکان لە دەستەی گشتی گومرگەکان تۆمار ناکرێن، بەڵکو لە ڕێگەی قاچاخ و دەروازە نایاسایییەکان هاوردە دەکرێن"، نەبیل مەرسوومی وادەڵێت. 

 

ئەوەی پێویستە بیزانیت: گەورەیی قەبارەی هاوردەکردنی ئەندۆمی بۆ عێراق، بانکی فیدراڵی ئەمریکای تووشی سەرسوڕمان  کردووە و گومانی ئەوە دەکات ئایا ئەم هاوردەکردنانە ڕاستەقینەن و ئارەزووی عێراقییەکان بۆ ئەندۆمی دەردەخەن، یان ئامرازێکن بۆ بەقاچاخبردنی دۆلار بۆ دەرەوەی وڵات.