نوێترین زانیاری لەبارەی خەرجکردنی مووچەی مانگی 10

ئاڤا نیوز

 

بەهۆی سەردانی محەممەد شیاع سوودانی، سەرۆکوەزیرانی عێراق بۆ هەرێمی کوردستان، چاوەڕوان دەکرێت کێشەکانی مووچە چارەسەر بکرێن و هەفتەی داهاتوو پارەی مووچەی مانگی 10 بخرێتە سەر هەژماری وەزارەتی دارایی و ئابووریی هەرێمی کوردستان.

 

وێنە گەورەکە: دوو هەفتەیە لیستی مووچەی مانگی 10ی فەرمانبەرانی هەرێمی کوردستان ڕادەستی بەغدا کراوە، بەڵام تاوەکو ئێستا پارەکە خەرج نەکراوە. گرفتێک لەبەردەم خەرجکردنی مووچەی بەشێکی مانگی 10 و مووچەی مانگەکانی 11 و 12 هەیە، ئەویش نەمانی پارەی نەختینەیە لە پشکی مووچە لە بودجەدا، هەرێمی کوردستان لە بەشەکانی دیکەی بودجە پارەی ماوە و پێویستە بۆ پشکی مووچە بگوازرێتەوە.

 

لێدوانی فەرمی: سەرچاوەیەک لە وەزارەتی دارایی و ئابووری حکومەتی هەرێمی کوردستان بە ئاڤا نیوزی ڕاگەیاند، هەموو ڕێکارەکانی لیستی مووچە جێبەجێ کراون، تەنیا بابەتی (موناقەلە) گواستنەوەی پارە ماوە، ئەگەر سوودانی لە سەردانەکەی بۆ هەرێمی کوردستان بڕیاری چارەسەرکردنی دابێت، ئەوا دەمێنێتەوە سەر ئەوەی ئێمە هەفتەی داهاتوو داهاتی ناوخۆ ڕادەست بکەین، وەزارەتی دارایی عێراقیش مووچە بنێرێت.

 

سەرچاوەکەی وەزارەتی دارایی ئاشکرای کرد، ئەگەر تاوەکو ڕۆژی یەکشەممە 17 مانگ بەغدا پارە نەنێرێت، ئەوا ڕۆژی دووشەممە لیژنەیەکی دیکەی هەرێمی کوردستان هەر بۆ بابەتی مووچە دەچێتە دەغدا.

 

لەلایەکی دیکەوە: لەبارەی ڕادەستکردنی داهاتی ناوخۆ سەرچاوەکەی وەزارەتی دارایی وتی: ئەو بڕە داهاتەی ڕادەستی بەغدای دەکەن دیار نییە چەندە، ڕەنگە ڕادەستکردنیشی بکەوێتە ڕۆژی 17 و 18ی ئەم مانگە، چونکە پێداچوونەوەی دەوێت، داهاتەکەش هی مانگی حەوتی ئەمساڵە.

باکگراوند: ئێوارەی دوێنێ پێشەوا هەورامانی، وتەبێژی حکومەتی هەرێمی کوردستان بۆ ئاڤا نیوز ئاشکرای کرد، محەمەد شیاع سوودانی لە کۆبوونەوەی لەگەڵ سەرۆکوەزیران بارزانی، بەڵێنی داوە هەرسێ مووچەی کۆتایی ئەمساڵ بنێرێت.