پەرلەمانی عەرەبی سەرکۆنەی هەڕەشەکانی ئیسرائیل بۆسەر عێراق دەکات

ئاڤا نیوز

 

پەرلەمانی عەرەبی سەرکۆنەی هەڕەشەکانی ئیسرائیل بۆ هێرشکردنە سەر عێراق دەکات و پشتیوانی تەواوی خۆی بۆ سەروەری، ئاسایش و دەستوەرنەدان لە کاروباری ناوخۆیی دووپات دەکاتەوە.

 

وێنە گەورەکە: ئیسرائیل لە ڕێگەی سکاڵانامەیەکەوە کە بۆ ئەنجوومەنی ئاسایشی نێودەوڵەتی ناردووە، هەڕەشە لە گرووپە چەکدارەکانی عێراق دەکات و تۆمەتباریان دەکات بەوەی هێرشی کوشندەیان دژی ئیسرائیل کردووە و بە مافی خۆشی دەزانێت وەڵامی ئەو هەڕەشانە بداتەوە کە لە خاکی عێراقەوە دەکرێتە سەریان.

 

ڕاگەیێنراوی فەرمی: لە ڕاگەیێنراوەکەی پەرلەمانی عەرەبیدا، جگە لە سەرکۆنەکردنی هەڕەشەکانی ئیسرائیل، سکاڵاکەی ئیسرائیل بۆ ئەنجوومەنی ئاسایشی نێودەوڵەتی شەرمەزار دەکات و ئاماژە بۆ ئەوە دەکات "دەبێت ئیسرائیل سەرەتا خۆی پابەند بێت بە بڕیارەکانی ئەنجوومەنی ئاسایشی نێودەوڵەتی و بڕیارەکانی کۆمەڵەی گشتیی نەتەوە یەکگرتووەکان بۆ ڕاگرتنی دەستبەجێی ئەو کۆمەڵکوژی و شەڕ جینۆسایدەی کە زیاتر لە ساڵێکە لە فەلەستین ئەنجامی داوە، هاوکات دەستدرێژییە دڕندەکانی بۆ سەر لوبنان بوەستێنێت."

 

لەلایەکی دیکەوە: پەرلەمانی عەرەبی داوای لە کۆمەڵگەی نێودەوڵەتی و دامەزراوەکانی وڵاتانی چالاک کرد گوشار بخەنە سەر ئیسرائیل و پلانەکانیان ڕابگرن بۆ ڕاکێشانی ناوچەکە بۆ شەڕێکی ناوچەیی کە ئاسایش و سەقامگیری ناوچەکە تێکدەدات.

 
ئەوەی پێویستە بیزانیت: ڕۆژی سێشەممە 19-11-2024، محەممەد شیاع سوودانی سەرۆکوەزیرانی عێراق سکاڵانامەکەی وەزارەتی دەرەوەی ئیسرائیلی بۆ ئەنجوومەنی ئاسایشی نێودەوڵەتی بە "پاساوێک بۆ دەستدرێژیکردنە سەر عێراق ناوبرد.