سەرۆکی پێشووی بەڕازیل بە هەوڵدان بۆ کودەتا تۆمەتبار دەکرێت

ئاڤا نیوز

 

سەرۆکی پێشووی بەڕازیل، بە هەوڵدان بۆ ئەنجامدانی کودەتا لەو وڵاتە تۆمەتبار دەکرێت، هاوکات پۆلیس 37 کەسی دیکە دەخاتە ژێر لێپێچینەوەی یاساییەوە. 

 

چیرۆکی سەرەکی: پۆلیسی فیدراڵیی بەرازیل داوای لە داواکاری گشتیی کردووە جایێر بۆڵسۆنارۆ، سەرۆکی پێشووی بەڕازیل و 37 کەسی دیکە بخاتە ژێر لێپێچینەوەی یاسایی و تۆمەتی "هەوڵدان بۆ هێنانەخوارەوەی دەسەڵاتێکی یاسایی و دیموکراسیی بە ڕێگەی تووندوتیژی کودەتا و تاوانی ڕێکخراو" دادگایی بکرێن. 

 

ئەوەی پێویستە بیزانیت: بۆڵسۆنارۆ تۆمەتبارە بەوەی کە ساڵی 2022 دوای شکستهێنانی لە هەڵبژاردنەکانی سەرۆکایەتیی کۆماریی بەڕازیل پلانی کودەتای لە دژی دەسەڵات داڕشتووە و هەوڵی داوە لەو ڕێگەیەوە بگاتەوە بە دەسەڵات.

 

ئەوەی لەبارەیەوە دەگوترێت: بەرپرسانی بەڕازیل هەوڵەکانی بۆڵسۆنارۆیان بە "هەوڵدان بۆ لاوازکردنی دیموکراسیی بەڕازیل" وەسف کردووە. 

 

ئەمەش بزانە: بۆڵسۆنارۆ، کە سیاسییەکی ڕاستڕەوە، بە جیاوازییەکی کەم بەرامبەر بە لولا داسیلڤا، کە سیاسییەکی چەپڕەوە، هەڵبژاردنەکەی دۆڕاند و دانی بە شکستی خۆیدا نەنا، بەڵام دواجار ئامادەبوو کە دەسەڵات ڕادەست بکات.