حکومەتی عێراق لەبارەی سێ مووچەی کۆتایی ئەمساڵ بڕیاری دا

ئاڤا نیوز

حکومەتی عێراق بڕیار دەدات بۆ مووچەی سێ مانگی کۆتایی ئەمساڵ بڕی دوو تریلیۆن و 280 ملیار دینار خەرج بکات.

وێنە گەورەکە: ئەنجوومەنی وەزیرانی عێراق بە سەرپەرشتی محەممەد شیاع سوودانی کۆبووەوە و لەبارەی مووچەی مووچەخۆرانی هەرێمی کوردستان بڕیاری دا.

زانیاریی تایبەت: لە کۆبوونەوەکەدا بڕیار دراوە بۆ مانگەکانی 10 و 11 و 12، بۆ هەر مانگێک بڕی 760 ملیار دینار وەکو مووچەی مووچەخۆرانی هەرێمی کوردستان خەرج بکرێت، واتە بە کۆی گشتی دەکاتە دوو تریلیۆن و 280 ملیار دینار.

ئەوەی پێویستە بیزانیت: حکومەتی هەرێمی کوردستان بۆ مووچەی مانگی 10 پێویستی بە 996 ملیار دینارە، بەمپێیە بڕی 236 ملیار دینار کورتهێنان دروست دەبێت، بۆ هەرسێ مانگیش قەبارەی کورتهێنان دەبێتە 708 ملیار دینار.

لەلایەکی دیکەوە: لە کۆبوونەوەی ئەنجوومەنی وەزیران بڕیار دراوە لیژنەیەكی هاوبەش لە نێوان هەردوو حکومەتی عێراق و هەرێمی کوردستان پێكبهێنرێت بۆ پێداچوونەوە و ئامادەكردنی حیسابی کۆتایی، پێویستە لیژنەکە لە ماوەی كەمتر لە 10 ڕۆژدا ڕاپۆرت ئامادە بكەن.