پارتی سەردانی هەموو لایەنەكان دەكات و یەكێتیش دانیشتنی هیچ لایەنێک ڕەتناكاتەوە

ئاڤا نیوز 

لە ڕۆژانی داهاتوودا كۆبوونەوە و سەردانی لایەنەكان بۆ پێكهێنانی كابینەی دەیەمی حكومەتی هەرێمی كوردستان دەستپێدەكات، پارتیش كە براوەی یەكەمی هەڵبژاردنە سەردانی سەرجەم لایەنەكان دەكات.

زانیاریی بەدەستهاتوو: لە دوو ڕۆژی داهاتوودا شاندی پارتی دیموكراتی كوردستان كە پێكهاتوون لە هۆشیار زێباری، پشتیوان سادق، دڵشاد شەهاب و ئومێد سەباح، سەردانی لایەنە سیاسییەكانی هەرێمی كوردستان دەكات و سەبارەت بە پێكهێنانی كابینەی دەیەمی حكومەت و بەشداریكردن و نەكردنیان گفتوگۆیان لەگەڵ دەكات.

لێدوانی فەرمی: سالار عوسمان، ئەندامی کۆمیتەی ناوەندی پارتی بە ئاڤا نیوزی ڕاگەیاند: وەکو پارتی سەردانی هەموو لایەنەکان دەکەین، ئەوانەی دەنگی زۆر یان کەمیان بەدەستهێناوە.

لەلایەكی دیكەوە: جەعفەر شێخ مستەفا، سەرۆکی ئەنجوومەنی پاراستنی  بەرژەوەندییەکانی یەکێتی لە كۆنفڕانسێكی ڕۆژنامەوانیدا ڕایگەیاند: یەكێتی دانیشتن لەگەڵ هیچ لایەنێك ڕەتناكاتەوە و ئامادەیە بۆ هەموو لێكتێگەیشتن و ڕێككەوتن و هاوپەیمانیێتییەك.

گۆشەیەكی دیكە: ئەمڕۆ سێشەممە 26-11-2024، دڵشاد شەهاب، وتەبێژی سەرۆکایەتیی هەرێمی کوردستان ڕایگەیاند، لەگەڵ لایەنە سیاسییەکان هەماهەنگی دەکەن بۆ ڕێکخستنی یەکەم دانیشتنی پەرلەمانی کوردستان، هاوکات ڕۆژی 02-12-2024 کاتژمێر 11ـی پێشنیوەڕۆ وەک یەکەم ڕۆژی دانیشتنی پەرلەمانی کوردستان دیاریکراوە.

 

زانیاریی زیاتر: دڵشاد شەهاب باسی لەوەش کرد جگە لە کۆمەڵی دادگەری، لایەنەکانی دیکە ئامادەیی خۆیان بۆ بەشداریکردن لە کۆبوونەوەکە دەربڕیوە و هەوڵەکان بۆ ئەوەن بەزووترین کات کابینەی دەیەمی حکومەتی هەرێمی کوردستان پێکبهێنرێت.