دواکەوتنی مووچە کاریگەری لەسەر بلاک فرایدەی دروست دەکات

ئاڤا نیوز

لە هەرێمی کوردستان و تەواوی جیهاندا ساڵانە لە هەینی ڕەش داشکاندنی گەورە دەکرێت بۆ کەلوپەل و پێداویستی و خواردن، هاووڵاتییانیش دەیانەوێت لەو ڕۆژە دا پێداویستییە دڵخوازەکانیان بە نیوەی نرخ بکڕن. 

 

وێنە گەورەکە: بلاک فرایدەی کۆتا هەینی مانگی تشرینی دووەمە و بە "هەینی ڕەش" ناوزەند دەکرێت، لە تەواوی جیهان ئەو ڕۆژە گرنگی تایبەتی پێدەدرێت، زۆرینە براندە جیهانییەکانیش لەو ڕۆژەدا داشکانی گەورە دەکەن، خەڵکی بۆ کڕینی بەرهەمەکان ڕوو لەو شوێنانە دەکەن نرخەکانیان دابەزاندووە، لە هەرێمی کوردستانیش ئێستا گرنگی زیاتر بەو ڕۆژە دەدرێت.

 

لێدوانی فەرمی: ژیر ئەرکان، بەڕێوەبەری لقی دارین گەیم لە سلێمانی، بە ئاڤا نیوزی ڕاگەیاند: "بە بەراورد بە ساڵانی 2018-2019 بازاڕ باش نییە، خراپی ڕەوشی دارایی و دواکەوتنی مووچە کاریگەری لەسەر بلاک فرایدەی دروست کردووە و خەڵکی بۆ کڕینی بەرهەمەکان زۆرکەم سەردانمان دەکەن".

 

ژیر ئەرکان گوتیشی: لە ڕۆژی 28ی مانگەوە دەستمان بە بلاک فرایدەی کردووە، ئێمە ئامێرەکانی گەیم وەک لاپتۆپ، ئێکس بۆکس، مێز و ئێکسسواراتەکان دەفرۆشین، لەناو ئەو بەرهەمانەی کە ئەمساڵ خواستی بەرچاوی خەڵکی لەسەر بووە "مۆنیتەرە".

 

لەلایەکی دیکەوە: هاوسەر عەلی، خاوەنی هاوسەر ستۆر لە هەولێر، بە ئاڤا نیوزی ڕاگەیاند: شەش ڕۆژە دەستمان بە بلاک فرایدەی کردووە و سبەی کاتژمێر 12:00 کۆتایی دێت،  ئێکسسواراتی موبایل نمایش دەکەین و پڕفرۆشترینیش لە ئەمساڵدا کەڤەری موبایل بووە.

 

باکگراوند: مێژووی سەرهەڵدانی بلاک فرایدەی دەگەڕێتەوە بۆ ساڵی 1869، ئەو کاتە بازاڕەکانی ئەمریکا دووچاری قەیرانێکی گەورەی فرۆشتن بوونەوە، بە ئامانجی قەرەبوو کردنەوەی ئەو بێ بازاڕییە گەورەیە، بیرۆکەی داشکاندنی گەورە هاتە ئاراوە بە ئامانجی زیادکردنەوەی فرۆش.