شاری حەما؛ ئۆپۆزسیۆن پێشڕەوی دەکات و سوپای سووریاش کشانەوە ڕەتدەکاتەوە

ئاڤا نیوز

 

ئۆپۆزسیۆنی چەکداری سووریا دەڵێت، ئۆپەراسیۆنی کۆنترۆڵکردنی شاری حەمای لە ناوەڕاستی سووریا دەستپێکردووە، وەزارەتی بەرگریی سووریاش ڕەتیدەکاتەوە لەو شارە کشابێتەوە.

 

وێنە گەورەکە: دوای کۆنترۆڵکردنی زۆرینەی پارێزگای حەلەب لەلایەن گروپە چەکدارەکانی ئۆپۆزسیۆن و کشانەوەی سوپای سووریا بەبێ بەرگرییەکی ئەوتۆ لە شارەکە، ئێوارەی ئەمڕۆ دەنگۆی کشانەوەی سوپای سووریا لە پارێزگای حەماش بڵاوبووەوە.

 

زانیاریی بەدەستهاتوو: بەگوێرەی ئەو گرتە ڤیدیۆییانەی لە تۆڕە کۆمەڵایەتییەکان و لەلایەن خودی چەکدارانی گرووپەکانی ئۆپۆزسیۆن بڵاوکراوەتەوە، چەکدارەکان گەیشتوونەتە دەروازەی شاری حەما و لەپێشڕەوی بەردەوامدان.

 

لەلایەکی دیکەوە: وەزارەتی بەرگریی سووریا لە ڕاگەیێنراوێکدا ئاماژەی بەوەکردووە، هێزەکانیان لە هەموو ناوچەکان لە بەرگریکردن و ڕووبەڕووبوونەوەی "گرووپە تیرۆرستییەکان" بەردەوامن، داواش لە هاووڵاتیان دەکات باوەڕ بەو دەنگۆیانە نەکەن کە لەبارەی دۆخی مەیدانی شەڕ بڵاودەبێتەوە.