کۆمەڵی دادگەری لەبارەی بەشداریکردن لە پەرلەمان: بەگوێرەی بارودۆخ قسەی خۆمان دەبێت

ئاڤا نیوز 

 

لە یەکەم دانیشتنی پەرلەمانی کوردستان لە کۆی 100 کاندیدی دەرچوو، دوو کاندیدی دەرچووی کۆمەڵ ئامادەنەبوون و بەرپرسی دەزگای هەڵبژاردنی کۆمەڵی دادگەری دەڵێت، "هەڵوێستی ئێستامان بریتییە لە بایکۆتی خولی شەشەمی پەرلەمان  بەگوێرەی بارودۆخیش قسەی خۆمان دەبێت".

 

وێنە گەورەکە: کۆمەڵی دادگەریی کوردستان لە هەڵبژاردنی ئەمجارەی پەرلەمانی کوردستان ژمارەی دەنگەکانی کەمی کردووە و تەنیا سێ کورسی بەدەستهێناوە، حیزبەکە ڕاستەوخۆ دوای ڕاگەیاندنی ئەنجامی بەرایی هەڵبژاردن بایکۆتی پەرلەمانی ڕاگەیاند، بەڵام لە دانیشتنی یەکەمی پەرلەمان دوور لە بڕیاری حیزبەکەی هێرۆ عەتار، کاندیدی دەرچوویان لە بازنەی سلێمانی ئامادەبوو و سوێندی یاسایی خوارد، ئێستا کۆمەڵ تەنیا دوو کورسی ماوەتەوە و ڕوون نییە ئەوانیش دەبنە پەرلەمانتار یاخود نا.

 

لێدوانی فەرمی: بێستوون حەمەساڵح، بەرپرسی دەزگای هەڵبژاردنی کۆمەڵ بە ئاڤای ڕاگەیاند، "هەڵوێستی خۆمان نەگۆڕیوە و بایکۆتی خولی شەشەمی پەرلەمانی کوردستانمان کردووە، بەڵام پێدەچێت پرۆسەی هەڵبژاردنی دەستەی سەرۆکایەتیی پەرلەمان دوابکەوێت و بەگوێرەی بارودۆخ قسەی خۆمان دەبێت و بڕیار دەدەین."

 

ئەوەی پێویستە بیزانیت: بەگوێرەی پەیڕەوی ناوخۆی پەرلەمان، کاندیدی سەرکەوتوو دەبێت لە ماوەی مانگێکدا سوێندی یاسایی بخوات، ئەگەر ئەو ماوەیە تەواوبوو نووسراوێک ئاراستەی حیزبەکە دەکرێت، ئەگەر پێداگربوون لەسەر بڕوای خۆیان ئەوکات بەگوێرەی یاسای هەڵبژاردن، کۆمیسیۆنی هەڵبژاردنەکان بە گوێرەی ڕیزبەند بەکاندیدێکی هەمان لیست پڕ دەکرێتەوە ئەگەر هیچیان ئامادەنەبوون، پەنا بۆ پەیڕەوکردنی سیستەمیی "باقی ئەقوا" دەبرێت.

 

لەلایەکی دیکەوە: جگە لە ئەندامانی کۆمەڵی دادگەریی لاهوور شێخ جەنگیش بۆ سوێندخواردنی یاسایی ئامادەی دانیشتنی پەرلەمان نەبووە و لە شوێنی ناوبراو کاندیدی سەرکەوتووی بەرەی گەل لە بازنەی سلێمانی، سامان تاهر نادر بە 681 دەنگ کە لە دوای ئەو زۆرترین دەنگی هەیە دەبێت بە پەرلەمانتار.