سەرژمێری بۆ کوردانی کەنەدا دەکرێت

ئاڤا نیوز

چەند چالاکوانێک لە کەنەدا، لەڕیگەی ئۆنڵاینەوە سەرژمێری بۆ ژمارەی دانیشتووانی کورد دەکەن و دەیانەوێت لەو ڕێگەیەوە هەم ژمارەی ڕاستەقینەی کورد لەو وڵاتە تۆمار بکەن، هەم لە پێشکەشکردنی خزمەتگوزارییە فەرمییەکانیشدا زمانی کوردی جێگیر بکەن.

وێنە گەورەکە: لەکاتێکدا پرۆسەی سەرژمێری لە عێراق و هەرێمی کوردستان بەبێ هاونیشتمانیانی دەرەوەی وڵات دەکرێت، چەند چالاکوانێک لە ڕێگەی ئۆنڵاینەوە سەرژمێری بۆ کوردانی کەنەدا دەکەن و تاوەکو ئێستاش نزیکەی هەزار خێزان تۆمارکراون.

لێدوانی فەرمی: شێروان ئازاد کە چالاکوانێکی مافەکانی مرۆڤە و سەرپەرشتی پرۆژەکە دەکات، بە ئاڤا نیوزی ڕاگەیاند: زیاتر لە هەزار خێزان لە سەرژمێرییەکەدا تۆمارکراون، ئەو خێزانانە 39.7% کوردی باشووری کوردستانن، 37% کوردی ڕۆژهەڵات، 11.8%  خەڵکی باکوور و 11.5% یشیان کوردی ڕۆژئاوای کوردستانن.

زانیاریی زیاتر: لە سەرژمێرییەکەدا چوار پرسیار لە کوردانی دانیشتووی کەنەدا دەکرێت کە ئەمانەن:

- لە کام بەشی کوردستانەوە هاتوویت بۆ کەنەدا؟

 -لە کام ویلایەت و شار دەژین؟

 -ژمارەی ئەندامانی خێزانەکەت چەند کەسە؟

-ژمارە مۆبایل و ئیمەیڵی خێزانەکە؟

بۆچی گرنگە: بەپێی گوتەی شێروان ئازاد، فەرمانگەکانی حکومەتی کەنەدا خزمەتگوزاری بە زمانەکانی عەرەبی و فارسی و زمانەکانی دیکەش پێشکەش دەکەن، ئەگەر ژمارەی ڕاستەقینەی کورد لە وڵاتەکە دەرکەوێت، ئەوا بە زمانی کوردیش خزمەتگوزاری پێشکەش دەکرێت، هاوکات لە کتێبخانەکانیشدا گۆشەیەک بۆ کتێبە کوردییەکان دادەنرێت.