ئێران: بەرفراوانبوونی تیرۆر لە سووریا زیانی بۆ عێراق و تورکیاش دەبێت

ئاڤا نیوز

 

وەزیری دەرەوەی ئێران نیگەرانیی خۆی لەبارەی بارودۆخی سووریا دەردەبڕێت، هاوکات پێیوایە بەرفراوانبوونی "گرووپە تیرۆریستییەکان" زیان بۆ عێراق، ئوردن و تورکیا و تەنانەت ئێرانی دەگەیێنێت.

 

وێنە گەورەکە: لە چەند ڕۆژی ڕابردوودا هێزەکانی ئۆپۆزیسیۆنی سووریا شاری حەلەبیان کۆنترۆڵ کرد، ئێستا ئەو هێزانە بەنیازی پێشڕەویی زیاترن بەرەو شاری حەمما، کە شارێکی گرنگ و ستراتیژیی سووریایە، هێزە دژبەرەکان لە ئامادەکاریدان بۆ شەڕێکی گەورەتر لەوەی لە حەلەب ڕووی دا.

 

ڕاگەیێنراوی فەرمی: عەباس عێراقچی، وەزیری دەرەوەی ئێران ڕایگەیاند: کۆمەڵێک ئامادەکاری بۆ هێورکردنەوەی دۆخی سووریا کراوە لەپێناو دۆزینەوەی چارەسەری هەمیشەیی، ئەگەر حکومەتی سووریا داوای هێزمان لێبکات ئەوکات بەدواداچوون بۆ ڕەوانەکردنی هێز بۆ ئەو وڵاتە دەکەین.

 

زانیاریی زیاتر: عێراقچی بە نیازە لەبارەی دۆخی سووریا سەردانی ڕووسیا بکات، چونکە مۆسکۆ گەرەنتیکاری مانەوەی حکومەتی بەشار ئەسەد بووە تاوەکو ئێستا.