هێڵەکانی پەیوەندیکردن لە شاری حەلەب ڕاگیران

ئاڤا نیوز

 

بە هۆی هێرشی گرووپە ئۆپۆزیسیۆنەکانی سووریا بۆ سەر شاری حەلەب هێڵی پەیوەندییەکان لەو پارێزگایە ڕاگیران.

 

وێنەگەورەکە: شەڕ و ئاڵۆزییەکانی سووریا زیاتر لە هەفتەیەکە دەستی پێکردووە و تا ئێستا شاری حەلەب و ئیدلب و چەند شار و ناوچەیەکی دیکە کەوتوونەتە ژێر دەسەڵاتی چەکدارانی هێزە ئۆپۆزیسیۆنەکانی ئەو وڵاتە و شەڕ بەردەوامە، دوای داگیرکردنی شاری حەلەب ئێستا هێلەکانی پەیوەندیکردن لەو شارە ڕاگیراوە.

 

ڕاگەیێنراوی فەرمی: ئاژانسی هەواڵی "سانا"ـی سووریا لە زاری کۆمپانیای پەیوەندییەکانی سووریاوە بڵاویکردەوە، بەهۆی هێرشی گرووپە ئۆپۆزیسیۆنەکان بۆ سەر کۆمپانیای ئاڵوگۆڕە تەلەفۆنییەکان لە ناوچەکانی ناوەڕاست و باکووری سووریا، ئێستا پەیوەندییەکان لە پارێزگای حەلەب ڕاگیراون.

 

بۆچی گرنگە: پچڕاندنی هێڵەکانی پەیوەندیکردن لە حەلەب، هۆکارێک دەبێت بۆ ئاگادار نەبوونی هاوڵاتییان لە هەر ڕووداو و پێشهاتێک کە لە شارەکە ڕوودەدات.

 

زانیاریی زیاتر: حەلەب دووەم گەورەترین شاری سووریایە و ناوچەیەکی ستراتیژییە بۆ حکومەتی سووریا لە هەموو ڕوویەکەوە.